Ginpapaimbestigahan han mga migrante nga Pilipino an nadiskubre nga dirudilain nga ghost project o diri tinuod nga proyekto han Department of Migrante Workers (DMW) ngan Department of Foreign Affairs (DFA) ha US ngan Taiwan.

Sigon ha DMW, nag-aalutaga ini han ₱5 kamilyon kada tuig para ha mga shelter o temporaryo nga urukyan han mga migrante nga ginpapadalagan han mga non-governmental organization ngan han ahensya han Taiwan. Kundi sigon kan Father Joy Tajonera, usa nga Pilipino-Amerikano nga misyonaryo nga padi ngan nag-aadministrar ha shelter nga Bahay Ugnayan, diri ini nakakakarawat han subsidyo tikang ha Manila Economic and Cultural Office tikang 2022.

Nahibaruan liwat han padi nga nag-alutaga an ahensya hin ₱2.9 kamilyon para ha “MWO shelter” ha Taipei nga serrado ha presente.

Ha US, ginkundenar han Bagong Alyansang Makabayan-USA Washington an ghost project han DFA ha Philippine Consulate ha Washington DC. Ha luyo han nakaalutaga nga pondo nga ₱83.73 kamilyon para ha 2025 ngan ₱88.9 kamilyon para ha 2026 diri pa gihap matad-an han mga Pilipino ha US kun hain ini. Waray report kun ano an nahitabo ha pondo. Ginkwestyon liwat han grupo kun nahingangain an pondo para ha Assistance to Nationals han DFA nga nabalor hin ₱9.8 kabilyon para ha 2025. Haros waray iginhahatag nga serbisyo an ahensya ha mga Pilipino nga nanginginahanglan, labina ha mga Pilipino nga gindetiner han Immigration Customs Enforcement.