Pakigbisog para ha CBA han mga superbisor ha PLDT. Susrunod nga paggios an iginlansar han mga superbisor ha PLDT Inc hadin Enero. Panawagan nira an pagkab-ot han usa nga mahinungdanon nga collective bargaining agreement (CBA) para ha 2026-2028 giutan han Gabay ng Unyon sa Telekomunikasyon ng mga Superbisor sa PLDT (GUTS-PLDT) ngan liderato han PLDT Inc. Nagtikang an negosasyon han mga tinaglawas han GUTS ngan liderato han PLDT para ha bag-o nga CBA hadton Nobyembre 28, 2025 kundi kahuman han 16 kabeses nga negosasyon waray pa mahinungdanon nga napagkaurusahan.

25-katuig nga isyu han iligal nga tanggalay ha Toyota. Nagpiket an Toyota Motors Philippines Corporation Workers’ Association ha upisina han Department of Labor and Employment (DOLE) ha Intramuros, Manila hadton Enero 26. Igin-insister nira ha ahensya nga batunon na an 25 katuig nga isyu han iligal nga tanggalay ngan an padayon nga paghihikaw ha katungod ha kolektibo nga negosasyon. Hadton 2001, masobra 230 nga trabahador nga membro han unyon an iligal nga gintanggal han Toyota kasunod han pag-iinsister han unyon han negosasyon para ha CBA ngan welga han mga trabahador.

Pagsukna ha mahinay nga aksyon han NLRC Region 3. Nagpiket an mga membro han National Federation of Labor Unions-Kilusang Mayo uno atubangan han National Labor Relations Commission han Region 3 ha San Fernando, Pampanga hadton Enero 21. Ginsukna nira an ahensya ha mga kontra-trabahador nga desisyon nga igin-gawas hini ha nakalabay ngan an kamahinay ha pag-aksyon ha iba pa nga kaso nga iginsalawad han mga trabahador.

Panawagan para ha umento ha suhol ha Calabarzon. Nagprotesta an mga trabahador han Southern Tagalog ha upisina han Regional Tripartite Wages an Productivity Board IV-A ha Calamba, Laguna hadton Enero 26. Iginrehistro nira an panawagan para ha dugang nga suhol ha bug-os nga nasud nga nakakasadang ngan makaburuhi ha usa nga pamilya. Ginsukna nira an ahensya ha paghahatag han sensilyo nga umento ha suhol ha nakalabay.