Paim-imbestigaran dagiti Pilipino a migrante ti natakwatan a nadumaduma a ghost project wenno saan a pudno a proyekto ti Department of Migrant Workers (DMW) ken Department of Foreign Affairs (DFA) idiay US ken Taiwan.

Segun iti DMW, mangilatlatang daytoy ti ₱5 milyon iti tinawen para kadagiti shelter wenno temporaryo a pagdagusan dagiti migrante a patpatarayen dagiti non-governmental organization ken dagiti ahensya iti Taiwan. Ngem segun ken Father Joy Tajonera, maysa a Pilipino-Amerikano a misyonero a padi ken mangimatmaton iti shelter a Bahay Ugnayan, saan daytoyen a makaaw-awat ti subsidyo manipud iti Manila Economic and Cultural Office manipud 2022.

Naamwan met ti padi a nangilatang ti ahensya ti ₱2.9 milyon para iti “MWO shelter” idiay Taipei nga iti agdama ket nakarikep.

Idiay US, kinundenar ti Bagong Alyansang Makabayan-USA Washington ti ghost project ti DFA a Philippine Consulate idiay Washington DC. Iti laksid ti nakalatang a pondo nga ₱83.73 milyon para iti 2025 ken ₱88.9 milyon para iti 2026 ket saan pay laeng a mabirukan dagiti Pilipino idiay US nu ayan na daytoy. Awan ti ulat nu anya ti napasamak iti pondo. Binabalaw met ti grupo nu sadinno ti pappapanan ti pondo para iti Assistance to Nationals ti DFA nga agbalor ti ₱9.8 bilyon para iti 2025. Dandani awan ti serbisyo nga it-ited ti ahensya kadagiti Pilipino nga inbalud ti Immigration and Customs Enforcement.