Ginapaimbestigaran sang mga Pilipinong migrante ang natukiban nga nanari-sari nga ghost project ukon indi matuod nga proyekto sang Department of Migrant Workers (DMW) kag Department of Foreign Affairs (DFA) sa US kag Taiwan.

Suno sa DMW, nagtalana ini sang ₱5 milyon kada tuig para sa mga shelter ukon temporaryo nga pasilungan sang mga migrante nga ginapadalagan sang mga non-governmental organization kag sang ahensya sa Taiwan. Apang suno kay Father Joy Tajonera, isa ka Pilipino-Amerikano nga misyonero nga pari kag nagadumala sa shelter nga Bahay Ugnayan, wala na ini nakabaton sang subsidyo halin sa Manila Economic and Cultural Office halin 2022.

Nahibaluan man sang pari nga nagtigana ang ahensya sang ₱2.9 milyon para sa “MWO shelter” sa Taipei nga sa subong sirado.

Sa US, ginkundenar sang Bagong Alyansang Makabayan-USA Washington ang ghost project sang DFA nga Philippine Consulate sa Washington DC. Sa pihak sang natalana nga pondo nga ₱83.73 milyon para sa 2025 kag ₱88.9 milyon para sa 2026 indi pa gihapon makita sang mga Pilipino sa US kon diin ini. Wala sang report kon ano ang natabo sa pondo. Ginkwestyon man sang grupo kon diin nagkadto ang pondo para sa Assistance to Nationals sang DFA nga nagabalor sang ₱9.8 bilyon para sa 2025. Halos wala sang ginahatag nga serbisyo ang ahensya sa mga Pilipino nga nagakinahanglan, ilabi na sa mga Pilipino nga ginadetenir sang Immigration and Customs Enforcement.