Laban para iti CBA dagiti superbisor iti PLDT. Agsasaruno a tignay ti insayangkat dagiti superbisor iti PLDT Inc daytoy Enero. Awag da ti pananggun-od ti maysa a nabagas a collective bargaining agreement (CBA) para iti 2026-2028 iti baet ti Gabay ng Unyon sa Telekomunikasyon ng mga Superbisor sa PLDT (GUTS-PLDT) ken ti liderato ti PLDT Inc. Nangrugi ti negosasyon dagiti mangibagi ti GUTS ken liderato ti PLDT para iti baro a CBA idi Nobyembre 28, 2025, ngem kalpasan ti 16 a daras a negosasyon ket awan pay ti nabagas a napagtutulagan.

25- tawen nga isyu ti iligal a panagikkat ti Toyota. Nagpiket ti Toyota Motor Philippines Corporation Workers’ Association iti upisina ti Department of Labor and Employment (DOLE) idiay Intramuros, Manila idi Enero 26. Inrupir da iti ahensya a sungbatanen ti 25 tawen a pakaseknan iti iligal a panagikkat ken ti agtultuloy a panangipaidam ti karbengan iti kolektibo a negosasyon. Idi 2001, nasurok 230 a mangmangged a kameng ti unyon ti iligal nga inikkat ti Toyota kasaruno ti panangirupir ti unyon ti negosasyon para iti CBA ken welga dagiti mangmangged.

Panangbatikos iti nabuntog nga aksyon ti NLRC Region 3. Nagpiket dagiti kameng ti National Federation of Labor Unions-Kilusang Mayo Uno iti sango ti National Labor Relations Commission Region 3 idiay San Fernando, Pampanga idi Enero 21. Binatikos da ti ahensya kadagiti kontra-mangmangged a desisyon nga inruar daytoy iti napalabas ken ti nabuntog nga aksyon iti dadduma pay a kaso nga inpila dagiti mangmangged.

Panawagan para iti umento iti sweldo idiay Calabarzon. Nagprotesta dagiti mangmangged ti Southern Tagalog iti upisina ti Regional Tripartite Wages and Productivity Board IV-A idiay Calamba, Laguna idi Enero 26. Inrehistro da ti panawagan para iti nayon a sweldo iti intero a pagilyan nga umdas ken makabiag iti maysa a pamilya. Binatikos da ti ahensya iti panangited ti barya-barya nga umento iti sweldo iti napalabas.