Away para sa CBA sang mga superbisor sa PLDT. Asod-asod nga hublag ang ginlunsar sang mga superbisor sa PLDT Inc sining Enero. Panawagan nila ang paglab-ot sang isa ka signipikante nga collective bargaining agreement (CBA) para sa 2026-2028 sa tunga sang Gabay ng Unyon sa Telekomunikasyon ng mga Superbisor sa PLDT (GUTS-PLDT) kag pamunuan sang PLDT Inc. Nagsugod ang negosasyon sang mga tiglawas sang GUTS kag pamunuan sang PLDT para sa bag-o nga CBA sadtong Nobyembre 28, 2025 apang pagkatapos sang 16 ka beses nga negosasyon wala pa sang signipikante nga nakasugtan.

25-tuig isyu sang iligal nga kakasanay sa Toyota. Nagpiket ang Toyota Motor Philippines Corporation Workers’ Association sa opisina sang Department of Labor and Employment (DOLE) sa Intramuros, Manila sadtong Enero 26. Ginagiit nila sa ahensya nga sabton na ang 25 ka tuig nga hambalanon sa iligal nga kakasanay kag ang padayon nga pagdingot sang kinamatarung sa kolektibong negosasyon. Sadtong 2001, masobra 230 ka mamumugon nga myembro sang unyon ang iligal nga ginkakas sang Toyota sunod sang pag-giit sang unyon sang negosasyon para sa CBA kag welga sang mga mamumugon.

Pagbatikos sa mahinay nga aksyon sang NLRC Region 3. Nagpiket ang mga myembro sang National Federation of Labor Unions-Kilusang Mayo Uno sa atubang sang National Labor Relations Commission Region 3 sa San Fernando, Pampanga sadtong Enero 21. Ginbatikos nila ang ahensya sa mga kontra-mamumugon nga desisyon nga ginpaguwa sini sa nagligad kag ang pagkahinay sa pag-aksyon sa iban pa nga kaso nga ginpasaka sang mga mamumugon.

Panawagan para sa saka sa sweldo sa Calabarzon. Nagprotesta ang mga mamumugon sa Southern Tagalog sa opisina sang Regional Tripartite Wages and Productivity Board IV-A sa Calamba, Laguna sadtong Enero 26. Ginrehistro nila ang panawagan para sa dugang nga sweldo sa bug-os nga pungsod nga nagakaigo kag makabuhi sa isa ka pamilya. Ginbatikos nila ang ahensya sa paghatag sang sensilyo nga saka sa sweldo sang nagligad.