Inyanunsyo ti Kilusang Bayan Kontra Kurakot (KBKK) idi Enero 19 a balbaliw daytoy nga agisayangkat ti nasaknap a protesta a kontra-korapsyon inton Pebrero 25, kagiddan ti pananglagip iti maika-40 anibersaryo ti panagalsa nga EDSA People Power. Ti grupo ti nangiyuna iti 100,000-katao a demonstrasyon idi Setyembre 21, 2025 ken 20,000-katao a tignay protesta idi Nobyembre 30, 2025 laban iti korapsyon idiay Luneta Park, Manila.

Iti anunsyo ti KBKK, kadwa daytoy ti nadumaduma a sektor ken grupo nga aktibo a makipaspaset iti tignay a kontra-korapsyon iti pagilyan. Kabilang ditoy ti Bagong Alyansang Makabayan (Bayan), grupo ken konseho dagiti kabataan estudyante a nangiyuna iti dadakkel a walkout idi maudi a paset ti 2025, dagiti mangmangged ken nakurapay iti syudad, babbai, manursuro, mangmangged iti salun-at, natataengan ken dadduma pay.

Kunada, iti laksid ti nagbalin a tuluy-tuloy a panagkalampag dagiti grupo ken publiko iti rehimen Marcos ket sumagmamano pay laeng ti napasungbat ken awan pay ti naibalud a “big fish” wenno kangrunaan a sangkot iti korapsyon. Binabalaw da met ti panangiyapura ti rehimen iti panangipasa iti linteg para iti nailyan a badyet para iti 2026 nga iti kaunggan na ket natatek pay latta ti pork barrel ken dadduma pay nga insertion. Nayon ditoy, dakkel met a basaran ti panagtignay da ti panangibasura ti komite iti Kongreso iti reklamo nga impeachment laban ken Marcos.

Panangapput ken panagipawil. Kinundenar met ti KBKK ti panangapput ken panagipawil ti rehimen Marcos kadagiti tumaktakder iti kontra-korapsyon. Saan a bumaba iti 72 nga indibidwal ti pinilaan ti reklamo ti Philippine National Police (PNP) iti Department of Justice (DOJ) para iti sedisyon ken panangprobokar ti sedisyon nga addaan kainaigan na iti Anti-Cybercrime Prevention Act of 2012.

Kabilang kadagiti inreklamo ti PNP iti DOJ ni Renato Reyes Jr, pangulo ti Bayan ken dagiti lider-estudyante manipud kadagiti konseho, pagiwarnak ken progresibo a grupo a da Tiffany Faith Brillante, Joaquin Buenaflor, Jacob Baluyot ken Aldrin Kitsune. Napuntirya dagiti naireklamo gapu iti partisipasyon iti protesta a Layus idiay Luneta idi Setyembre 21, 2025 ken panagipaskil iti social media ti takder da a kontra-korapsyon.

Nagisayangkat kadagiti protesta dagiti progresibo a grupo laban iti panaglipit ti PNP ken rehimen Marcos. Immawag da a dagus nga ibasura dagiti reklamo. Inpaganetget da a dagiti kurakot iti gubyerno ti rumbeng a kamaten ken ibalud, saan a dagiti lumablaban iti korapsyon.