Gin-anunsyo sang Kilusang Bayan Kontra Kurakot (KBKK) sadtong Enero 19 nga liwat ini magalunsar sang lapnagon nga protesta kontra-korapsyon sa Pebrero 25, kadungan sang pagdumdom sa ika-40 nga anibersaryo sang pag-alsa EDSA People Power. Ang grupo ang nagpanguna sa 100,000 ka tawo nga demonstrasyon sadtong Septyembre 21, 2025 kag 20,000-ka tawo nga hublag protesta sadtong Nobyembre 30, 2025 batuk sa korapsyon sa Luneta Park, Manila.

Sa anunsyo sang KBKK, kaupod sini ang lain-lain nga sektor kag grupo nga aktibo nga nagapakigbahin sa kahublagan kontra-korapsyon sa pungsod. Lakip diri ang Bagong Alyansang Makabayan (Bayan), grupo kag konseho sang mga pamatan-on estudyante nga nagpanguna sa mga dalagko nga walkout sadtong ulihi nga bahin sang 2025, mga mamumugon kag imol sa syudad, kababaehan, mga manunudlo, mamumugon pang-ikaayong-lawas, mga tigulang kag iban pa.

Suno sa ila, sa pihak sang tayuyon nga pag-uyog sang mga grupo kag publiko sa rehimen Marcos pipila lang ang napasabat kag wala pa sang nabilanggo nga “big fish” ukon mga kilala nga imbolbado sa korapsyon. Ginbatikos man nila ang pagratsada sang rehimen sa pagpasar bilang layi sang pungsodnon nga badyet para sa 2026 nga sa kaidadalman puno pa gihapon sang pork barrel kag iban pa nga insertion. Dugang diri, dako nga basehan man sang hublag nila ang pagbasura sang komite sa kongreso sa reklamo nga impeachment batuk kay Marcos.

Pagpahipos kag pagpangsumpo. Ginkundenar man sang KBKK ang pagpahipos kag pagpanumpo sang rehimen Marcos sa mga nagatindog sa kontra-korapsyon. Indi magnubo sa 72 ka indibidwal ang ginpasakaan sang reklamo sang Philippine National Police (PNP) sa Department of Justice (DOJ) para sa sedisyon kag pagpanulsol sang sedisyon nga may kaangtanan sa Anti-Cybercrime Prevention Act of 2012.

Lakip sa mga ginreklamo sang PNP sa DOJ si Renato Reyes Jr, pangulo sang Bayan, kag mga lider-estudyante halin sa mga konseho, pahayagan kag progresibo nga grupo nga sanday Tiffany Faith Brillante, Joaquin Buenaflor, Jacob Baluyot, kag Aldrin Kitsune. Gintarget ang mga ginreklamo tungod sa partisipasyon sa protestang Baha sa Luneta sadtong Septyembre 21, 2025 kag pag-post sa social media sang ila mga panindugan kontra-korapsyon.

Naglunsar sang mga protesta ang mga progresibong grupo batuk sa pagpang-ipit sang PNP kag rehimen Marcos. Nagpanawagan sila nga gilayon ibasura ang mga reklamo. Ginagiit nila nga ang mga kurakot sa gobyerno ang dapat nga lagson kag bilangguon, indi ang mga nagapakigbato sa korapsyon.