Pagsugod pa lang sa gerang agresyon sa US-Israel batok sa Iran, nagbahad na ang Department of Energy (DoE) nga posibleng ipasaka sa mga kompanya sa lana ang presyo sa gasolina hangtud ₱10/litro ug sa diesel hangtud ₱20. Dugang kini sa ₱7 hangtud ₱10/litro nga pagsaka sa presyo sa mga produkto sa petrolyo gikan sa Enero. Dihadihang gipatas-an ang mga presyo taliwala sa mga pahayag sa mga opisyal sa DoE nga igo ang suplay sa lana sa nasud alang sa 30-60 ka adlaw nga konsumo.

Ubos sa Oil Deregulation Law, gawasnon ang mga kompanya sa lana nga awtomatikong magtaas sa presyo nga walay pagbutyag sa kompyutasyon ug uban pang detalye. Gitugyan usab sa estado ang katungod niini nga susihon kung makatarunganon ba o dili ang mga pagtaas.

Dugang nga kalisud ang gipahamtang nga 12% VAT ug excise tax sa mga produkto sa petrolyo nga mokabat sa ₱10/litro alang sa gasolina, ₱6/litro alang sa diesel ug ₱3/litro alang sa kerosin.

Labaw sa 90% sa gikonsumo nga lana sa Pilipinas gi-import. Refined nga lana nga gipalit una gikan sa South Korea, China ug Singapore ang dakong bahin niini. (Nag-import usab og krudo nga lana gikan sa Middle East apan sa mas gamay nga kantidad kay usa na lang ang refinery sa nasod.) Dakong butang, apan dili direkta, ang pagbag-o-bag-o sa presyo sa crude oil sa kalibutanong merkado. Sa kasamtangan, milapas na sa $80/bariles ang presyo niini. Posible kining mosaka sa $100/bariles kung molungtad ang mga pagpang-atake sa US sa Iran.

Peligro sa kinabuhi

Peligroso karon ang kinabuhi sa gibanabanang 2.15 ka milyon nga mga Pilipino sa Middle East, kadaghanan mga mamumuo sa batakang mga trabaho sama sa pagka-katabang sa sa mga balay, serbisyo ug konstruksyon. Dugay nang giantos sa mga mamumuong Pilipino ang walay pulus nga serbisyo sa mga embahada sa Pilipinas atubangan sa mga abuso nga gipasamot sa sistemang kafala, dili pagbayad og sweldo, mga paglapas sa kontrata ug uban pa. Sama sa miaging mga kaguliyang, hinay ug dili igo ang tubag sa gubyernong Pilipino sa mga reklamo sa apektadong mga migrante. Dili makasugakod ang mga kawani sa embahada bisan sa yano nga pagsabat sa mga hotline niini.

Panawagan sa grupong Migrante nga hatagan ang mga migranteng mamumuo sa Middle East og luwas nga temporary shelter ug sigurohon nga abri ang linya sa komunikasyon. Panawagan usab niini ang dali nga pagproseso sa mga dokumento ug walay kondisyon sa pagpauli kanila. Sa ulahing ihap, kapin na sa 1,000 ka migrante ang nagpadayag nga gusto na mouli.