Hustisya ug pagpanubag ang panawagan sa mga progresibong grupo ug residente sa Rodriguez, Rizal alang sa mga namatay, nawala ug nasamdan sa pagdahili sa land fill (bukid sa basura) sa Barangay San Isidro niadtong Pebrero 20.

Nahugno ang gibanabanang 420,000 metriko kubikong basura sa Phase 5 sa Rizal Provincial Sanitary Landfill nga misakop sa unom ka ektarya nga yuta. Ang labayanan gidumalaan sa Green Leap Solid Waste Management, Inc., subsidyaryo sa International Solid Waste Integrated Management Specialist Inc.

Sumala sa mga residente, naa sa 100 ka tawo ang naapektuhan sa pagdahili, 50 kanila gitaho nga nawala ug usa ang nakumpirma nga namatay. Gimakmak sa mga residente ang klarong cover-up sa kompanya ug lokal nga gubyerno nga namugos nga duha lang ang nawala ug usa ang namatay. Nag-awhag sila og imbestigasyon aron mapunting ang hinungdan sa paghugno ug kung kinsa ang kapasanginlan niini. Gipangayo usab nila ang makatarunganong tabang sa gubyerno sa mga naapektuhan sa paghugno.

Niadtong Pebrero 22, miadto sa land fill ang Kadamay ug uban pang progresibong grupo aron maglansad og protesta ug magdagkot og kandila. Pipila ka adlaw human niini, nagsang-at og resolusyon sa House of Representatives ang Makabayan Bloc aron imbestigahan ang insidente. Samtang, nag-isyu og order ang Department of Environment and Natural Resources aron temporaryong isira ang land fill sugod Pebrero 24.

Una ang insidente, gireport na dinhi ang unom ka beses nga pagdahili sa land fill, sunog niadtong Abril 2025 ug matag unya-unya nga pagtagas ug pagbaha sa leachgate o makahilo nga likido gikan sa land fill.