Nabanhaw sa panumduman sa mga Pilipino ang brutal nga mga pagpatay sa gyera batok sa droga atol sa pagdungog alang sa kumpirmasyon sa mga pasangil batok kang Rodrigo Duterte sa International Criminal Court (ICC). Gipahigayon ang pagdungog sa The Hague, The Netherlands niadtong Pebrero 23-24 ug Pebrero 26-27.

Sulod sa upat ka adlaw, naglalis ang mga abogado sa prosekusyon ug sa mga biktima sa usa ka bahin, ug sa depensa ni Rodrigo Duterte sa pikas bahin, atubangan sa mga huwes sa Pre-Trial Chamber I sa ICC. Gitanyag nila ang mga argumento ug kontra-argumento kung nganong kinahanglan ipadayon sa bista ang mga pasangil sa kanhi presidente.

Sa bahin sa prosekusyon, gipatin-aw nila nga labaw pa sa igo ang mga basehan aron ipadayon sa bista ang kaso. Sistematiko nilang gipahiluna ang paunang ebidensya nga nagpamatuod sa sentral nga papel ni Duterte sa lapad ug sistematikong pag-atake sa mga sibilyan sa mga kabus nga komunidad, gikan Nobyembre 2011 hangtud Marso 2019.

Isip indirect co-perpetrator, dako ang responsibilidad ni Duterte sa pagdisenyo ug pagpakaylap sa brutal nga pagpamatay, pagbutang sa mga tig-suporta niini sa tag-as nga posisyon, paghatag og ganti, pagmugna og kultura sa kawalay kahadlok sa silot, ug pagmando sa pulis ug militar nga mupatay. Giplastar nila ang mga dokumento ug pahayag sa mga saksi. Gipahiluna usab nila ang mga pamulong ni Duterte asa direkta niyang gimando ang mga pagpamatay sa mga “suspek,” nga gipangatarungan dayon sa mga padayag nga “misukol.” Ingon sa mga abugado, adunay tibuok nga plano si Duterte ug iyang mga kakunsabo nga mopatay og mga sibilyan nga walay katakus mosukol.

Gipahiluna sa mga abogado sa mga biktima ang kadaot nga resulta sa mga pagpatay sa mga biktima ug sa ilang mga komunidad. Giduot nila nga lakip sa sistematikong gipangpatay mao ang mga bata, sukwahi sa giingon sa depensa nga si Kian de los Santos ra ang menor de edad nga napatay sa gyera batok sa droga. Giawhag nila ang mga huwes nga paminawan ang mga biktima ug hatagan sila og higayon nga ipadayon sa bista ang kaso sa korte.

Sa pikas bahin, gikwestyon pag-usab sa abogado ni Duterte ang basehan sa mga pasangil ug ang awtoridad sa ICC bisan pa nagpagawas na og desisyon ang korte bahin niini. Giduso sa depensa ni Duterte nga walay basehan ang mga kaso batok kaniya kay wala kunoy nahitabo nga dinaghan ug sistematikong pagpamatay. Gikwestyon niya ang mga proseso, ebidensya ug mismo ang mga pahayag sa mga saksi. Gibalik-balik niya ang argumento nga ang mga biktima napatay sa mga “lehitimong operasyon sa pulis,” ug nga ang mga napatay gamay ra kon itandi sa mga giaresto. Ingon niya nga ang mga berbal nga pamulong ni Duterte sa pagpamatay mga pasulabi ra o hyperbole. Pugos niyang gipagula nga ang pagkaso sa ICC pagpanghasi lang sa kasamtangang rehimeng Marcos, bisan gisang-at ang kaso niadto pang 2018.

Sumala sa prosekusyon, ang pagkwestyon mismo sa depensa sa interpretasyon sa mga ebidensya ug pahayag sa mga saksi usa na ka dakong rason nganong kinahanglan kini idayon sa bista. Singgit sa mga biktima ang hustisya. Giawhag nila ang pagtaral sa hukmanan ug pagpanubag kang Duterte sa iyang mga krimen.

Dugay nang gihamdom sa katawhang Pilipino ang pagdungog alang sa kumpirmasyon sa mga pasangil. Sa pagsugod sa pagdungog, gatusan ka Pilipino ang nagmartsa sa The Hague aron pangayuon sa korte nga ipadayon sa bista ang mga pasangil kang Duterte ug hatagan og angayng silot ang iyang mga krimen. Kauban nila ang pila sa mga pamilya sa mga biktima ug ilang mga abogado.

Sa Pilipinas, adunay mga protesta ug dungan nga pagpanan-aw ang ubang mga pamilya ug ilang mga suporter sa livestream sa pagdungog.

Adunay susama nga dungan ng pagpanan-aw sa Cebu. Base sa lig-on nga presentasyon sa kaso sa prosekusyon ug sa huyang nga kontra-argumento sa depensa, salig sila nga moabante sa bista ang kaso. Ipagula sa Pre-Trial Chamber I ang desisyon niini sulod sa 60 ka adlaw human sa pagdungog, o sa katapusan sa Abril.