Subling gipakita sa katawhang Pilipino ang kusog sa panaghiusa batok sa korapsyon ug kakabus sa mga protesta dungan sa pagsaulog sa ika-40 nga anibersaryo sa Pangalsa sa EDSA niadtong Pebrero 25. Sa mga protesta, dinaghang nitambong ang mga mamumuo, mag-uuma, kabus sa dakbayan, kabatan-onan, kababayen-an, tawong-simbahan, titser, empleyado ug uban pang demokratikong sektor.

Pinakadako ang panagtigom sa 12,000 ka Pilipino, kadaghanan kabatan-onan, sa EDSA Shrine sa suok sa Ortigas Avenue. Sa pagpangulo sa Kilusang Bayan Kontra Kurakot (KBKK), Youth Rage Against Corruption, Bagong Alyansang Makabayan (Bayan), Artikulo XI, Bunyog Pagkakaisa, ug Sanlakas, ilang gipanawagan: “Padayon ang Pakigbisog batok sa Korapsyon ug Kakabos! Tanan nga Nahilambigit, Kinahanglan Panubagon!”

Nakighiusa ug mitambong sa panagtigom sila Bishop Gerardo Alminaza, presidente sa Caritas Philippines ug tsirman sa Catholic Bishops’ Conference of the Philippines Episcopal Commission on Social Action, si Sr. Mary John Mananzan sa Movement Against Tyranny, ug mga kongresista sama ni Rep. Leila de Lima sa Mamamayang Liberal ug mga representante sa Makabayan Bloc.

Wala napugngan ang martsa bisan pila ka beses nga gisulayan harangon sa mga pulis. Sa kinatapusan sa pangatubang, duha ka aktibista ang gidakop sa mga pulis, pila ka adlaw nga gipreso ug gipasakahan og patong-patong nga mga kasong kriminal.

Dili moubos sa 150 ka organisasyon ug 400 ka indibidwal ang nagpadayag og suporta sa adlaw sa protesta. Sumala sa mga grupo, ang protesta usa ka “paghatag og hinungdan sa people power” nga kinahanglan ipadayon sa kasamtangang panahon labi na nga nagatunhay pa gihapon ang sistematikong korapsyon, kakabos sa katawhan ug paghari sa mga dinastiya ug dinagkong korapsyon. Sa partikular, hilabihan silang dismayado nga wala pa’y “mastermind” nga nadakpan sa nabutyag nga korapsyon sa flood control project ug uban pang proyekto sa rehimeng Marcos.

Kusog ang ilang singgit aron panubagon ug pakanaogon sa pwesto si Ferdinand Marcos Jr ug Sara Duterte tungod sa ilang pagkahilambigit sa sistematikong korapsyon. Giduso usab sa lain-laing sektor ang ila-ilang mga panawagan sa ekonomiya ug politika.

Mibalibad makighiusa

Sa usa ka bahin sa EDSA, gilunsad usab sa mga grupo ubos sa Trillion Peso March Movement (TPMM) ang bulag nga protesta diin mitambong ang pipila ka iladong personalidad ug artista. Mibalibad ang TPMM, ilabi na ang mga grupong SIKLAB, Tindig Pilipinas ug Akbayan Partylist, nga dapigan ang awhag sa mga lider sa simbahan ug uban pang grupo nga sibiko nga maghiusa.

Ang grupong Akbayan, sa partikular, supak sa mga panawagan nga nagtinguha na panubagon si Marcos ug iyang mga upisyal, tungod kay si Sara Duterte kuno ang makabenepisyo. Ang ilang mga panawagan sa protesta limitado lang sa mga anti-dynasty nga balaodnon ug mga reporma ug sobrang gilikayan ang mahisgutan o manganlan man lang si Marcos—ang hari sa korapsyon. Inila ang Akbayan nga kontra sa mga pambansa-demokratikong grupo.

Uban pang mga protesta

Gawas sa protesta sa EDSA, adunay mga protesta usab sa mga probinsya. Tataw niini ang liboang mitambong sa Baguio City, Iloilo City ug Bacolod City.

Adunay protesta ug mga aktibidad usab sa Dagupan City sa Pangasinan, Angeles City sa Pampanga, Tuguegarao City sa Cagayan, Santiago City, Ilagan ug Alicia sa Isabela, Naga City sa Camarines Sur, Legaspi City sa Albay, Kalibo sa Aklan, Roxas City sa Capiz, sa Antique, Tacloban City sa Leyte, Cebu City, Dumaguete City sa Negros Oriental, Cagayan de Oro City, Iligan City ug sa Davao City. Samtang, gitaho usab sa Simbahang Katoliko ang pag-apil sa komemorasyon sa halos 90 ka diyosesis sa tibuok nasud.

Sa ubang nasud, nagpahigayon og mga protesta ang mga migranteng Pilipino sa Germany, United Kingdom, Italy, Netherlands, Australia, Canada, US, ug Hongkong. Bisan layo sa Pilipinas aktibo silang misalmot aron padayon nga buhion ang kasaysayan ug ang espiritu sa Pangalsa sa EDSA.