Nagbukalbukal sa kasuko ang mga katawhan sa Iran ug Middle East sa pagpamomba sa US-Israel sa Iran nga mipatay og daghang sibilyan ug miguba sa mga imprastraktura. Usa sa labing gikasuko nila mao ang tinuyo ug duha ka beses nga pagbomba sa usa ka eskwelahan niadtong Pebrero 28 nga mipatay og 175, kadaghanan mga batang babaye edad 7-12.

Niadtong Marso 3, gatusan ka libong Iranian ang misalmot sa prusisyon sa Tehran aron ilubong ang mga batang babaye. Taliwala sa ilang kaguol, gikundena nila ang mga pagpamomba sa US ug gikasubo ang kamatayon sa ilang lider nga si Ali Khamenei. Gipanawagan nila ang kamatayon alang sa imperyalismong US ug Zionistang Israel. Saad nila nga ipanimalos ang pagpatay sa ilang mga lider ug kaigsuonan. Adunay parehas nga mga protesta sa mga probinsya gawas sa Tehran.

Gipanghimakak niining mga protesta ng gipakaylap sa imperyalismong US ug sa mga sulugoon niini sa internasyunal nga midya (lakip ang lokal nga midya sa Pilipinas) nga “gisaulog” ang mga Iranian sa pag-atake sa ilang gubyerno.

Daghang mga katawhan sa rehiyon ang nasuko sa US-Israel ug lig-on nga mibarog alang sa soberanya sa Iran. Adunay mga protesta atubangan o duol sa embahada sa US sa Iraq, Yemen, Jordan, Turkey, Oman ug Kuwait. Adunay mga paglihok nga nagkondena sa mga pagpamomba sa US, India, Pakistan, Japan, ug South Korea. Adunay parehas nga mga protesta sa US, Venezuela ug mga nasud sa Europe.

Sa Lebanon, aktibong nagadepensa ang armadong grupo nga Hezbollah batok sa bag-ong serye sa pagpamomba sa Israel sa habagatang bahin niini ug sa Beirut.

Sa Pilipinas, nagmartsa padulong sa embahada sa US sa Maynila ang mga progresibong grupo sa pagpangulo sa Bayan niadtong Marso 3. Gikundena nila ang gerang agresyon sa US-Israel sa Iran ug giduso ang pagpalayas sa mga base militar sa US sa Pilipinas. Usa ka adlaw una niini, naglansad og protesta isip pakighiusa sa katawhan sa Iran ang mga grupong pambansa-demokratiko sa Boy Scout Circle sa Quezon City. Mibisita usab sila sa Iran Embassy sa Makati City niadtong Marso 5 aron ihatud sa ambasador ang ilang pahasubo sa katawhang Iranian.