Kusganong gikundena sa rebolusyonaryong katawhang Pilipino ang imperyalismong US ug ang estado sa Zionistang Israel sa ilang walay puas nga pagpamomba sa Iran nga gisugdan kaniadtong Pebrero 28. Kini usa ka klaro nga pagtamak sa soberanya sa usa ka nasud nga adunay kaugalingong paghukom, ug bangis nga paglapas sa internasyunal nga balaod. Kini ang ikaduhang pag-atake sa US ug Israel batok sa Iran sukad Hulyo 2025, sa mando sa duha ka pasistang buang nga sila Donald Trump sa US ug Benjamin Netanyahu sa Israel.

Pinaagi sa presiso nga mga misayl, gipatuman ang asasinasyon sa lider ug pila pang upisyal sa gubyerno sa Iran. Gibomba ang eskwelahang elementarya sa dakbayan sa Minab kung asa kapin sa 160 ka batang babaye ang namatay. Gitarget ang mga planta sa nukleyar, bisan ang mga sibilyang bilding sa gubyerno, mga ospital, ug mga lugar nga makasaysayanon. Kapin sa 1,000 ka Iranian ang gitahong namatay sa unang lima ka adlaw sa paspas nga pambobomba, nga nagsalamin sa linuog nga pagpulbos sa Israel sa Gaza ug sa henosidyo niini batok sa katawhang Palestino.

Anaa sa Iran ang tanang katungod nga panalipdan ang kaugalingon batok sa pagpangatake sa US ug Israel. Nagpalupad kini og kaugalingong mga misayl nga mitarget sa mga base militar sa US sa Saudi Arabia, Kuwait, UAE, Bahrain, ug ubang nasud sa Middle East, apil sa mga pasilidad sa Israel.

Ang pagkaylap sa kalayo sa armadong panagbangi tinuyong resulta sa imperyalistang agresyon. Dugang pa kining gipakaylap sa US dihang gibomba ug gilunod duol sa baybay sa Sri Lanka ang di armado nga barkong pakiggubat sa Iran nga bisita sa mga ehersisyong pangdagat nga gipangulohan sa India, kapin 3,200 kilometro ang gilay-on gikan sa Iran. Nanghambog si Trump nga anaa sa US ang hilabihan kadakong arsenal nga igo alang sa gyera nga “walay katapusan.” Gibomba ug giatake usab sa mga tropang Israeli ang Lebanon ug gipalayas ang katawhan sa kapin 50 ka lungsod aron i-okupar ang habagatang bahin sa nasud.

Sama sa mga buwitre ang mga monopolyo kapitalista, labina ang dagkong kompanya sa lana, na nigamit sa gubat aron paspas nga ipasaka ang presyo sa krudo ug repinadong lana. Dugang nga grabeng krisis ang pagamugnaon niini, labina sa mga atrasadong nasud sama sa Pilipinas. Gikabalaka sa kapin duha ka milyon nga OFW sa Middle East nga mokaylap ug molungtad ang gubat. Liboan kanila ang mipili nga mopauli bisan walay trabaho nga naghulat kanila.

Walay bisan unsang rason nga makahatag katarungan sa walay puas nga pagsabwag og terorismo sa US ug Israel batok sa Iran. Gisugdan kini sa US nga walay ebidensya sa ilang pasangil nga “nagahimo ug armas nukleyar ang Iran.” Sama kini sa bakak nga “armas sa mass destruction” nga gigamit sa pag-atake sa Iraq niadtong 2003. Sama usab kini sa giimbento ni Trump nga usa ka “narco-terrorist state” ang gubyerno sa Venezuela dihang giatake ug gibomba kini niadtong Enero 3, ug gidagit ang presidente niini nga si Nicolas Maduro ug ang asawa niya nga si Cilia Flores.

Daw usa ka maton ang imperyalistang US nga andam manulong sa bisan unsang nasud nga wala misunod sa iyang dikta. Gihinambog ug gibayaw niini ang “pinakakusgang pwersang militar sa kalibutan” aron paluhuron ang tanan sa iyang pagharihari. Gipakita niini nga usa lamang ka limbong ang gitawag nga “rules-based order” nga gigamit aron lupigon ang mga karibal niini nga nasud. Ang tinuod, dili magpapugong ang imperyalismong US sa unsamang internasyunal nga balaod o lagda nga dili uyon mga interes niini sa ekonomya ug heyopulitika.

Sa walay puas nga pagpangatake sa Iran, klaro nga laraw sa imperyalismong US ang ilogon ang kontrol sa bahandianong rekurso sa lana niini, nga ikatulo nga pinakadako sa tibuok kalibutan. Gusto ni Trump nga dugmokon ang gubyerno sa Iran nga mibalibad moluhod sa unsa’y gusto sa mga monopolyo kapitalistang Amerikano. Laraw sa US nga ipahamtang ang iyang gahum sa Iran ug sa tibuok Middle East.

Ang ngilngig nga pag-atake sa US sa Iran salamin sa nagkagrabeng bangi sa mga imperyalistang gahum. Pagsiko kini sa US sa karibal niining China, nga nagapalit og lana nag-una sa Iran. Kabahin kini sa duso sa imperyalismong US nga usbon ang han-ayan sa kalibutan para padak-on ang bahandi ug rekurso nga direkta niining gigunitan.

Angayng suportahan ang katawhan sa Iran sa ilang pagpanalipod sa ilang kagawasan ug katungod sa pagbarug-sa-kaugalingon. Awhagon ang mga mamumuo ug katawhang Amerikano ug Israeli nga batukan ug ibagsak ang mga buang nga pasistang sila Trump ug Netanyahu. Makighiusa sa katawhan sa Palestine, Lebanon, Venezuela, Cuba, North Korea, Nicaragua ug uban pang mga nasud nga gidaogdaog sa US. Tukuron ang pinakalapad nga nagkahiusang prente batok sa imperyalistang gera.

Ibutyag ug batukan ang operasyong disimpormasyon sa US nga nagbiktima sa katawhang Pilipino. Isalikway ang mga bakak nila Trump ug Netanyahu. Angayng mobarog ang katawhang Pilipino batok sa pagpanghilabot-militar sa US sa Pilipinas ug batukan ang paggamit sa nasud para sa pagpangatake ug gyera. Pakusgon ang panawagan para lumpagon ang mga base militar ug pasilidad sa US ilalom sa EDCA, palayason ang mga tropang Amerikano sa nasud, tangtangon ang mga armas nga gihan-ok nila, ug tapuson ang mahulhogon ug makadaot nga mga war exercises.

Angayng ipakigbisog sa katawhang Pilipino ang tinuod nga kagawasan gikan sa kontrol ug pagpanghilabot sa US. Ang paghari ug pagpangawkaw sa US sa Pilipinas, kakunsabo sa mga lokal nga nagharing hut-ong ug gamit ang AFP isip instrumento sa pagpanumpo, ang nag-unang babag sa paglambo sa Pilipinas ug rason sa pag-antus sa lapad nga masa sa katawhang Pilipino.

Kinahanglang iasdang ang nasudnon-demokratikong rebolusyon pinaagi nag-una sa armadong pakigbisog aron tapuson ang paghari sa imperyalismong US at sa mga papet niini sa Pilipinas. Sa paglampos sa malungtarong gubat sa katawhan, matukod ang gubyernong magpasiugda sa nasudnong kagawasan. Kini ang nag-unang tampo sa katawhang Pilipino sa pakibigsog aron tapuson ang imperyalistang gera ug pagpangdaug-daog sa tibuok kalibutan.