Sunod-sunod ang pagpalayas sa mga mag-uuma ug demolisyon sa kabus-sa-dakbayan sa mga mangilog sa yuta sa lain-laing bahin sa nasud.

Sa Zambales, dili moubos sa 22 ka mag-uuma ug ilang pamilya ang gipalayas sa demolisyon ug pagpangilog sa yuta sa Purok 3, Barangay Balaybay, Castillejos niadtong Pebrero 23. Sumala sa mga mag-uuma, naa silay Certificate of Land Ownership Award gikan sa Department of Agrarian Reform alang sa 21 ka ektaryang yutang ginailog. Human sa pagbuto sa bulkang Pinatubo niadtong 1991, gipahibalo usab sa kanhi gobernador sa Zambales nga ihatag na kanila ang yuta. Gikan pa 1934, gitikad na sa ilang kaliwat ang maong yuta.

Sa Davao City, 600 ka pamilya ang nawad-an og balay sa dihang gidemolis ang ilang komunidad sa Arroyo Compound, Golden Valley, Matina Crossing niadtong Pebrero 27. Daghang residente ang napugos nga gub-on ang kaugalingong balay aron iluwas ang mga materyales ug ilang mga gamit. Gipahigayon ang demolisyon bisan walay klarong plano alang sa relokasyon ang lokal nga gubyerno sa Davao City. Wala usab pamuli nga kumpensasyon sa mga balay nga giguba ang kompanyang miangkon sa yuta.

Sa Taguig City, naglansad og kilos-protesta ang mga residente sa Panday Creekside, Barangay Palingon-Tipas atubangan sa city hall niadtong Pebrero 23 aron supakon ang hulga sa demolisyon sa ilang komunidad. Giduso nila sa lokal nga gubyerno nga tahuron ang ilang katungod sa kasigurohan sa panimuyo sa Panday Creekside.

Niadtong Marso 5, mikaylap ang kabalaka sa komunidad sulod sa SPD Compound, Western Bicutan sa dihang kalit nga misulod didto ang 150 ka sakop sa Philippine Navy, kauban ang mga pulis ug opisyal sa barangay. Nahibaloan sa mga residente nga plano magtukod og baraks ang AFP alang sa Navy sa compound. Mokabat sa 400 ka pamilya o 2,500 ka residente ang pagapalayason, kadaghanan sa ila upat ka dekada na nanimuyo sa dapit.