Napatay sa mga sundalo sa 3rd IB sa walay pili nga pagpamusil ang mag-uuma nga si Jaime Pabillar, 44 anyos, sa Barangay Cagtoto-og, San Jorge, Samar niadtong Pebrero 2. Si Pabillar naa sulod sa iyang panimalay kauban ang iyang asawa, anak ug apo dihang nagpaulan og bala ang mga sundalo.

Gipanghimakak sa Bagong Hukbong Bayan (BHB)-Western Samar (Arnulfo Ortiz Command) ang pasangil sa 3rd IB nga si Pabillar usa ka Pulang mangggubat. Giklaro sa hukbo sa katawhan nga si Pabillar usa ka sibilyan nga naa sulod sa balay nga temporaryong giadtuan sa yunit sa BHB. Naa sa baryo ang mga Pulang manggugubat aron mag-imbestiga sa sitwasyon sa mga residente nga naalaot sa sigeg ulan ug militarisasyon.

Sa dihang nagpabuto ang 3rd IB sa direksyon sa balay, wala mibalos og pabuto ang mga Pulang manggugubat ug paspas ng miikyas. Gituyo sa yunit nga ilayo sa peligro ang masang nagpasulod kanila sa balay.

Sa Barangay Bay-ang, tulo ka mag-uuma ang gipamusil sa 52nd IB niadtong Pebrero 20. Human niini, gikulata sila, giutingkay ang ilang mga gamit ug gi-interoga. Gihulga sila aron dili manumbong. Gisundan kini sa pagpanganyon ug lain pang insidente sa pagpang-istraping sa silingang mga barangay niadtong Pebrero 16.