Bisan taas na ang sweldo ug alawans, daghan sa Philippine National Police ang nalambigit sa mga kriminal nga aktibidad para sa suhol ug kwarta. Gamit ang pasistang gahum, ginakikilan, ginakawatan ug gina-abuso sa mga pulis ang ordinaryong katawhan.

Sumala mismo sa rekord sa PNP, labaw sa 2,500 ka pulis ang gitangtang sa pwesto adtong 2025 tungod sa ilang pagkalambigit sa pagbaligya og ilegal nga droga. Niadtong Pebrero, pito ka pulis ang nabutyag nga nangikil sa usa ka residente sa Maynila baylo sa pag-atras sa peke nga kaso sa ilegal nga droga nga gisang-at batok kaniya.

Sa Angono, Rizal, 10 ka pulis ang nagtanom og ebidensya, nangbugbog, nangawat ug nangikil sa usa ka estudyante nga ilang giakusahan nga nalambigit sa baligyaanay sa ilegal nga droga. Duha ka buwan siyang ilegal nga gipreso bisan naghatag na og kwarta ang iyang pamilya. Samtang, unom ka pulis sa Makati ang nabutyag nga nalambigit sa serye sa mga pagpangikil ug pagpangawat sa syudad.

Kini pipila lamang sa mga tataw nga pamatuod sa kinaiyanhong pasista ug abusadong karakter sa mga pulis. Padayon gihapon nga naghari-hari sulod niini ang kultura sa kawalay kahadlok sa pagsilot.