Niadtong Pebrero 26, giharang sa mga pwersa sa Cuba sa ilang utlanan ang usa ka speedboat nga naay sakay ang 10 ka paramilitar gikan sa US. Nagpabuto ang grupo, hinungdan nga napugos ang mga Cubano mga mobalos. Upat ang napatay ug unom ang nasamdan sa mga paramilitar. Gikondena sa Cuba ang sulayng pagsulod sa mga paramilitar sa laraw nga magsabwag og terorismo sa isla ug kagubot sa katawhan.

Nahitabo ang sulayng pagpanghilabot taliwala sa pagpahamtang sa US og bag-ong serye sa malupigon nga mga sangsyon batok sa Cuba. Kaniadtong Enero, nagpatuman ang US og “oil embargo” asa epektibong gibabagan sa presidente niini nga si Donald Trump ang tanang nasud nga mag-suplay og lana sa Cuba.

Ang pagharang sa lana gitawag ni Miguel Díaz-Canel, presidente sa Cuba, nga “kriminal, tinuyong paglapas ug dili makatawo.” Grabe ang epekto niini sa transportasyon, mga ospital ug medikal nga pasilidad, eskwelahan, turismo, ug produksyon sa pagkaon sa nasud. Kaniadtong Pebrero, kaduha nga iligal nga giharang sa Coast Guard sa US ang paglawig sa mga barkong nagkarga og lana gikan sa Mexico ug Venezuela padulong sa nasud.

Taliwala niini, daghan ang naghatag og suporta ug panaghiusa sa Cuba. Nagpadala og tinoneladang materyal nga tabang ang Mexico, usa sa mga nasud nga gihulga sa US nga pahamtangan og dugang nga taripa kung padayon kining magpadala og lana sa Cuba. Nagpadala usab og materyal nga ayuda, pinansya ug pagkaon ang Chile, Russia, China, Vietnam ug Spain.