Naghiusa ang mga residente sa pipila ka mga lungsod sa Rizal ug Samar aron batukan ang pagtukod sa mga windmill farm sa ilang mga prubinsya. Ang mga proyekto giduso sa Vena Energy, usa ka kompanyang nakabase sa Singapore ug usa sa pinakadako nga korporasyon sa “renewable energy” sa tibuok rehiyon sa Asia-Pacific.

Sa Rizal, nagprotesta ang mga residente sa Talim Island, usa ka isla nga anaa sa tunga sa Laguna de Bay, niadtong Pebrero 28 aron ipahunong ang pagtukod sa Talim Wind Power Project. Matod nila, kinahanglan ipahunong dayon ang proyekto tungod sa dala niining grabeng pagbaha ug pagdahili sa yuta tungod sa pagkadaut sa kinaiyahan ug kabukiran. Ang Island Wind Energy Corporation (IWEC), usa ka subsidiaryo sa Vena Energy, ang nagdumala sa proyekto.

Sumala sa mga residente, nagsugod ang konstruksyon sa proyekto sa kabukiran sa isla niadtong 2025. Duha ka tuig una niini, gisugdan na ang pagpamutol sa mga kahoy isip pagpangandam sa konstruksyon. Nagpagawas ang mga residente sa usa ka manipesto sa pagbatok, ubos sa grupo nga Kasama sa Pangangalaga ng Isla Talim o Kapit sa Talim.

Sa Samar, napugngan sa mga residente sa Calbayog City ang plano sa Vena Energy nga pagtukod ug mga wind turbine sulod sa Calbayog Pan-as-Hayiban Protected Landscape (CPHPL), usa ka watershed area nga kuhaanan sa tubig pang-inom sa syudad.

Niadtong Pebrero 24, nagpadayag ang kumpanya nga dili na kini magatukod ug bisan unsa nga istruktura sama sa wind turbine sulod sa CPHPL. Human kini sa unom ka bulan nga padayong pakibisog sa mga residente batok sa kumpanya ug lokal nga gubyerno tungod sa makadaut nga epekto niini sa ilang panginabuhi ug sa palibot. Lakip niini ang usa ka petisyon nga gipirmahan sa libu-libong residente sa syudad.

Bisan pa, mitugot gihapon ang lokal nga gubyerno nga iladlad na lang ang mga wind turbine sa mga baryo nga sakop sa mga distrito sa Tinambacan ug Oquendo. Nagsugod na ang kumpanya sa pagpangayo ug “certificate of no objection” gikan sa mga barangay nga maapektuhan sa proyekto. Atubangan niini, nanawagan ang mga grupo sa katawhan nga magpabiling mabinantayon sa mga pagsulay sa Vena Energy nga putlon ang mga kahoy ug tanom nga gigikanan sa panginabuhi sa mga lumulupyo.