Utro nga iginpakita han katawhan Pilipino an kusog han pagkakaurusa kontra ha korapsyon ngan kakurian ha ginhimo nga mga protesta kadungan han paghandum ha ika-40 nga anibersaryo han Pag-aalsa nga EDSA hadton Pebrero 25. Ha mga paggios, hiluagan nga nagpartisipar an mga trabahador, parag-uma, kablas ha syudad, kabatan-unan, kababayin-an, tawo ha singbahan, magturutdo, empleyado ngan iba pa nga demokratiko nga sektor.

Pinakadako an katitirok han 12,000 nga Pilipino, kadam-am kabatan-unan, ha EDSA Shrine ha kanto han Ortigas Avenue. Ha pangunguna han Kilusang Bayan Kontra Kurakot (KBKK), Youth Rage Against Corruption, Bagong Alyansang Makabayan (Bayan), Artikulo XI, Bunyog Pagkakaisa, ngan Sanlakas, panawagan nira: “Padayon an Pakigbisog ha Korapsyon ngan Kakurian! Tanan nga Dabi, Kinahanglan Papagbatunon!”

Nakig-usa ngan tinambong ha katitirok hira Bishop Gerardo Alminaza, pangulo han Caritas Philippines ngan tagapangulo han Catholic Bishops’ Conference of the Philippines Episcopal Commission on Social Action, hi Sr. Mary John Mananzan han Movement Against Tyranny, ngan mga magbaralaud nga hira Rep. Leila de Lima han Mamayang Liberal ngan mga tinaglawas han Makabayan Bloc.

Waray mapugngan an martsa nga pira kabeses nga gin-atentaran nga ulangon han mga pulis. Ha butnga han gitgitay, duha nga aktibista an gin-aresto han mga pulis, pira kaadlaw nga iginpriso ngan ginsalawdan han luun-luon nga mga kaso nga kriminal.

Diri mamenos ha 150 nga organisasyon ngan 400 nga indibidwal an nagpahayag han suporta ha adlaw han paggios. Sering han mga grupo, an paggios “paghatag importansya ha people power” nga ginkikinahanglan nga igpadayon ha presente nga panahon labina ngan naeksister pa gihap an sistemiko nga korapsyon, kakurian han katawhan ngan paghahadi han mga dinastiya ngan higante nga korapsyon. Ha partikular, sobra hira nga dismayado nga waray pa gihap “mastermind” nga nadadakop ha nabuksas nga korapsyon ha mga flood control project ngan iba pa nga proyekto han rehimen Marcos.

Naaningal an guliat nira para papagbatunon ngan ipalusad ha pwesto hira Ferdinand Marcos Jr ngan Sara Duterte ha pagkakadabi ha sistemiko nga korapsyon. Igin-insister liwat han magkalain-lain nga sektor an ira partikular nga mga pan-ekonomiya ngan pampulitika nga panawagan.

Nadiri makig-usa

Ha usa nga parte han EDSA, iginlansar naman han mga grupo ha ilarum han Trillion Peso March Movement (TPMM) an usa nga bulag nga paggios diin tinambong an pira nga kilalado nga personahe ngan artista. Diniri an TPMM, ha partikular an mga grupo nga SIKLAB, Tindig Pilipinas ngan Akbayan Partylist, nga bumaton ha panawagan han mga lider han singbahan ngan iba pa nga grupo nga sibiko nga magkaurusa.

An grupo nga Akbayan, ha partikular, natipa ha mga panawagan nga karuyag papagbatunon hi Marcos ngan iya mga upisyal, ha rason nga hi Sara Duterte kuno an magpupulos. An mga panawagan ha ira protesta limitado la ha mga proposisyon nga kontra-dinastiya ngan mga reporma ngan naglilikay nga malakbitan o mahinabi man la an ngaran ni Marcos—an hadi han korapsyon. Kilalado an Akbayan nga kontra ha mga nasyunal-demokratiko nga grupo.

Iba pa nga mga paggios

Labot ha protesta ha EDSA, nagkamayda gihap han paggios ha mga prubinsya. Landaw hini an yukut-yukot nga ginios ha Baguio City, Iloilo City ngan Bacolod City.

Nagkamayda gihap han protesta ngan aktibidad ha Dagupan City ha Pangasinan, Angeles City ha Pampanga, Tuguegarao City ha Cagayan, Santiago City, Ilagan ngan Alicia ha Isabela, Naga City ha Camarines Sur, Legazpi City ha Albay, Kalibo ha Aklan, Roxas City ha Capiz, ha Antique, Tacloban City ha Leyte, Cebu City, Dumaguete City ha Negros Oriental, Cagayan de Oro City, Iligan City ngan ha Davao City. Samtang, iginreport gihap han Singbahan Katoliko an pagpartisipar ha komemorasyon han haros 90 nga diyosesis ha bug-os nga nasud.

Ha iba nga nasud, naghimo han paggios an mga migrante nga Pilipino ha Germany, United Kingdom, Italy, the Netherlands, Australia, Canada, US, ngan Hongkong. Hirayo man ha Pilipinas aktibo hira nga napartisipar agud igpabilin nga buhi an kasaysayan ngan an diwa han Pag-aalsa nga EDSA.