Hadton Pebrero 27, ha pangunguna han Samahan ng Maliliit na Mangingisda ha San Miguel Bay (SMB), upisyal nga igintukod an Tanggol SMB Network ha Barangay Sabang ha Calabanga, Camarines Sur. Tuyo han alyansa nga tipahan an plano nga SMB offshore wind projects. Sigon ha alyansa, yukot-yukot nga parupangisda an mawawarayan han panginabuhi tungod ha proyekto. Direkta liwa nga atake an proyekto ha seguridad ha pagkaon ngan katungod han katawhan para ha rekurso ha dagat.

Ha iba nga bungto ha prubinsya, iginpapakigbisog han mga parag-uma an ira katungod ha tuna. Ha Barangay San Ramon ngan Salvacion, Siruma, naglansar han protesta an gatus-gatos nga mga residente hadton Pebrero 18 agud kundenaron an panlulupot han mga Villafuerte ha ira tuna.

Hadton Pebrero 20, nahiinsister han Portico Banasi Household Farmers Association an ira katungod ha urukyan ha ginhimo nga kumperensya ha munisipyo han Bula. Sigon ha grupo, imbes nga pamatian hira han tinaglawas han Philippine Commission on Urban Poor ngan sheriff han RTC Branch 31 nagin baga tagdepensa hira han mga parupanlupot han tuna. Waray tumambong ha kumperensya an mga tinaglawas han Colarina, Tan ngan han korporasyon nga Ruby Shelters Builders and Development Corporation. Samtang aada ha miting, ginbabantayan hira ha sakob han bilding han mga tawuhan han PNP nga mayda bitbit nga higtaas nga kalibre han pusil.