Liwat ginpakita sang pumuluyong Pilipino ang kusog sang paghiliusa batuk sa korapsyon kag kaimolon sa ginpatigayon nga mga protesta kadungan sang pagdumdom sa ika-40 nga anibersaryo sang Pag-alsang EDSA sadtong Pebrero 25. Sa mga aksyon, lapnagon nga nagpakigbahin ang mga mamumugon, mangunguma, imol nga taga-syudad, pamatan-on, kababaehan, tawong-simbahan, manunudlo, empleyado kag iban pa nga demokratikong sektor.

Pinakadako ang pagtililipon sang 12,000 ka Pilipino, kadam-an pamatan-on, sa EDSA Shrine sa kanto sang Ortigas Avenue. Sa pagpanguna sang Kilusang Bayan Kontra Kurakot (KBKK), Youth Rage Against Corruption, Bagong Alyansang Makabayan (Bayan), Artikulo XI, Bunyog Pagkakaisa, kag Sanlakas, panawagan nila: “Padayon nga Away Batuk sa Korapsyon kag Kaimolon! Tanan nga Imbolbado, Dapat Manabat!”

Nakig-isa kag nagtambong sa pagtililipon sanday Bishop Gerardo Alminaza, pangulo sang Caritas Philippines kag tsirman sang Catholic Bishops’ Conference of the Philippines Episcopal Commission on Social Action, si Sr. Mary John Mananzan sang Movement Against Tyranny, kag mga kongresista nga sanday Rep. Leila de Lima sang Mamamayang Liberal kag mga tiglawas sang Makabayan Bloc.

Wala mapunggan ang martsa nga pila ka sulit nga gintilawan nga balabagan sang mga pulis. Sa kasagsagan sang gitgitan, duha ka aktibista ang gin-aresto sang mga pulis, pila ka adlaw nga gin-detenir kag ginpasakaan sang sampaw-sampaw nga mga kasong kriminal.

Indi magnubo sa 150 ka organisasyon kag 400 ka indibidwal ang nagpahayag sang suporta sa adlaw sang hublag. Siling sang mga grupo, ang hublag “pagpakamahal sa people power” nga kinahanglan nga padayunon sa subong nga panahon ilabi pa nga nagaluntad pa gihapon ang sistematikong korapsyon, kaimolon sang pumuluyo kag paghari sang mga dinastiya kag higante nga korapsyon. Sa partikular, grabe ang ila pagkadismaya nga wala pa gihapon sang “mastermind” nga nadakpan sa nabuyagyag nga korapsyon sa mga flood control project kag iban pa nga proyekto sang rehimen Marcos.

Nagalanog ang singgit nila para pasabton kag papanaugon sa pwesto sanday Ferdinand Marcos Jr kag Sara Duterte sa pagka-imbolbar sa sistematikong korapsyon. Ginagiit man sang lain-lain nga sektor ang ila partikular nga mga panawagan pang-ekonomiya kag pangpulitika.

Indi luyag makig-isa

Sa isa ka bahin sang EDSA, ginlunsar naman sang mga grupo sa idalum sang Trillion Peso March Movement (TPMM) ang isa ka separado nga hublag kon diin nagtambong ang pila ka kilala nga mga personahe kag artista. Nagpamalibad ang TPMM, sa partikular ang mga grupong SIKLAB, Tindig Pilipinas kag Akbayan Partylist, nga sabton ang panawagan sang mga lider sang simbahan kag iban pa nga grupo sibiko nga mag-isa.

Ang grupong Akbayan, sa partikular, nagapamatuk sa mga panawagan nga luyag pasabton si Marcos kag iya mga opisyal, sa rason nga si Sara Duterte kuno ang magabenepisyo. Ang mga panawagan sa ila protesta limitado lang sa mga hagna kontra-dinastiya kag mga reporma kag tuman nga nagalikaw nga maupod ukon mamitlang man lang ang ngalan ni Marcos-ang hari sang korapsyon. Bantog ang Akbayan nga kontra sa mga grupong pungsodnon-demokratiko.

Iban pa nga mga hublag

Magluwas sa protesta sa EDSA, may protesta man sa mga probinsya. Matingkad sa mga ini ang linibo nga nag-aksyon sa Baguio City, Iloilo City kag Bacolod City.

May protesta man kag aktibidad sa Dagupan City sa Pangasinan, Angeles City sa Pampanga, Tuguegarao City sa Cagayan, Santiago City, Ilagan kag Alicia sa Isabela, Naga City sa Camarines Sur, Legaspi City sa Albay, Kalibo sa Aklan, Roxas City sa Capiz, sa Antique, Tacloban City sa Leyte, Cebu City, Dumaguete City sa Negros Oriental, Cagayan de Oro City, Iligan City kag sa Davao City. Samtang, ginreport man sang simbahan Katoliko ang pagpakigbahin sa komemorasyon sang halos 90 ka diyosesis sa bug-os nga pungsod.

Sa iban nga pungsod, nagpatigayon sang hublag ang mga migranteng Pilipino sa Germany, United Kingdom, Italy, the Netherlands, Australia, Canada, US, kag Hongkong. Malayo man sa Pilipinas aktibo sila nga nagapakigbahin para mapabilin nga buhi ang kasaysayan kag ang espirito sang Pag-alsang EDSA.