Hadton Pebrero 26, gin-ulang han mga pwersa han Cuba ha bawnderi han teritoryo nga kadagatan hini an usa nga speedboat nga mayda sakay nga 10 nga paramilitar tikang ha US. Nagpabuto an grupo, sanglit napiritan an mga Cubano nga bumulos. Upat an namatay ngan unom an nasamaran hini. Ginkundenar han Cuba an gin-atentar nga pagsulod han mga paramilitar nga mayda katuyuanan nga magsabrag han terorismo ha isla ngan magdurot han kasamok ha katawhan.

Nahitabo an gin-atentar nga pananamok ha butnga han pag-imponer han US han panibag-o nga serye han mga brutal nga sangsyon kontra ha Cuba. Hadton Enero, epektibo nga iginpatuman han US an usa nga “oil embargo” diin gindid-an han presidente hini nga hi Donald Trump an tanan nga mga nasud nga magsuplay han lana ha Cuba.

An paghihikaw han lana gintawag ni Miguel Díaz-Canel, presidente han Cuba, nga “kriminal, butaray ngan diri makatawo.” Grabe an epekto hini ha transportasyon, mga ospital ngan panmedikal nga pasilidad, eskoylahan, turismo, ngan produksyon han pagkaon han nasud. Hadton Pebrero, duha kabeses nga iligal nga gin-ulang han coast guard han US an paglalayag han mga barko nga nagdadara han lana tikang ha Mexico ngan Venezuela ngadto ha Cuba.

Ha butnga hini, binuhos an suporta ngan pagkig-usa ha Cuba. Nagpadara han tone-tonelada nga materyal nga suporta an Mexico, usa ha mga nasud nga gintarhug han US han higtaas nga taripa kun padayon ini nga magpapadara han lana ha Cuba. Nagpadara liwat han ayuda nga materyal, pinansya ngan pagkaon an Chile, Russia, China, Vietnam ngan Spain.