Grabe nga nangangalas an mga katawhan ha Iran ngan Middle East ha panmomba han US-Israel ha Iran nga nagpatay han damo nga sibilyan ngan nagruba han mga imprastraktura. Usa ha pinakaginkangalsan nira an tinuyo ngan duha kabeses nga panmomba ha usa nga eskoylahan hadton Pebrero 28 nga nagpatay han 175, kadam-an kabataan nga babaye edad 7-12.

Hadton Marso 3, gatus-gatos kayukot nga Iranian an nagpartisipar ha prusisyon ha Tehran agud ilubong an mga bata nga babaye. Ha butnga han ira pagkasubo, ginkundenar nira an mga panmomba han US ngan iginkabido an pagkamatay han ira lider nga hi Ali Khamenei. Iginpanawagan nira an kamatayon para ha imperyalismo nga US ngan Zionista nga Israel. Saad nira nga igbubulos an pagpatay ha ira mga lider ngan igkasi Iranian. Nagkamayda han kapareho nga mga paggios ha mga prubinsya gawas han Tehran.

Ginpahimuwa hini nga protesta an iginpapasarang han imperyalismo nga US ngan mga alipures hini ha internasyunal nga midya (hasta han lokal nga midya ha Pilipinas) nga buwa nga “nagselebrar” an mga Iranian ha pag-atake ha ira gubyerno.

Damo ha mga katawhan ha rehiyon an nangangalas ha US-Israel ngan madig-on nga naninindugan para ha soberaniya han Iran. Nagkamayda han mga paggios ha atubangan o hirani ha embahada han US ha Iraq, Yemen, Jordan, Turkey, Oman ngan Kuwait. Mayda mga protesta nga nagkukundenar ha mga panmomba han US ha India, Pakistan, Japan, ngan South Korea. Mayda kapareho nga mga protesta ha US, Venezuela ngan mga nasud ha Europe.

Ha Lebanon, aktibo nga nadepensa an mga armado nga grupo nga Hezbollah kontra ha panibag-o nga serye han panmomba han Israel ha sur nga parte hini ngan ha Beirut.

Ha Pilipinas, nagmartsa ngadto ha embahada han US ha Manila an mga progresibo nga grupo ha pangunguna han Bayan hadton Marso 3. Ginkundenar nira an gerra nga agresyon han US-Israel ha Iran ngan iginpanawagan an pagpapalayas han mga base militar han US ha Pilipinas. Usa kaadlaw antes hini, naglansar han protesta komo pakig-usa ha katawhan han Iran an mga nasyunal-demokratiko nga grupo ha Boy Scout Circle ha Quezon City. Kinadto gihap hira ha Iran Embassy ha Makati City hadton Marso 5 agud igpaabot ha ambassador an ira pakiduyog ha kasubo ha katawhan nga Iranian.