Hustisya ngan baratunon an panawagan han mga progresibo nga grupo ngan residente han Rodriguez, Rizal para ha mga namatay, nawawara ngan nasul-an ha pagtimpag han tambakan han basura ha Barangay San Isidro hadton Pebrero 20.

Natimpag an gintatantiya nga 420,000 kametriko kubiko han basura ha Phase 5 han Rizal Provincial Sanitary Landfill nga nalupgop ha unom kaektarya nga tuna. An basurahan gindudumara han Green Leap Solid Waste Management, Inc, subsidyaryo han International Solid Waste Integrated Management Specialist Inc.

Sigon ha mga residente, diri mamenos ha 100 katawo an naapektuhan han pagtimpag, 50 ha ira nahireport nga nawawara ngan usa an kumpirmado nga namatay. Ginkundenar han mga residente an butaray nga cover-up han kompaniya ngan lokal nga gubyerno ngan iginpipirit nga duha la an nawawara ngan usa an namatay. Nananawagan hira han imbestigasyon agud matudlok an hinungdan han pagtimpag ngan kun hin-o an mayda baratunon hini. Hangyo liwat nira an makatadungan nga suporta han gubyerno ha mga naapektuhan han pagtimpag.

Hadton Pebrero 22, kinadto ha tambakan an Kadamay ngan iba pa nga progresibo nga grupo agud maglansar han protesta ngan magtayok han kandila. Paglabay han pira kaadlaw, nagsalawad han resolusyon ha House of Representatives an Makabayan Bloc agud paimbestigahan an mga insidente. Samtang, nagpagawas han mando an Department of Environment and Natural Resources para temporaryo nga igpaserra an tambakan tikang hadton Pebrero 24.

Antes an diri pala maiha nga insidente, nahireport na dinhi an umom kabeses nga pagtimpag ha tambakan, sunog hadton Abril 2025 ngan pana-panahon nga pag-awas ngan pagbaha han leachate o makahirilo nga likido tikang ha tambakan.