Susrunod an pagpapaiwas ha mga parag-uma ngan demolisyon ha mga kablas-ha-syudad han mga parupanlupot han tuna ha magkalain-lain nga parte han nasud.

Ha Zambales, diri mamenos ha 22 nga parag-uma ngan ira pamilya an napalayas tungod ha demolisyon ngan panlulupot han tuna ha Purok 3, Barangay Balaybay, Castillejos hadton Pebrero 23. Sigon ha mga parag-uma, mayda hira katin nga Certificate of Land Ownership Award tikang ha Department of Agrarian Reform para ha 21 kaektarya nga tuna nga ginlulupot. Kahuman han pagbuto han bulkan nga Pinatubo hadton 1991, igin-anunsyo liwat han hadto anay gubernador han Zambales nga ginhahatag ha ira an tuna. Tikang pa 1934, gin-uuwat na an ira angkan an nasering nga tuna.

Ha Davao City, 600 nga pamilya an nawarayan hin balay han rub-on an ira komunidad ha Arroyo Compound, Golden Valley, Matina Crossing hadton Pebrero 27. Damo nga residente an napiritan nga rub-on an kalugaringon nga balay agud isalbar an mga materyales ngan ira higamit. Iginhimo an demolisyon ha luyo han kawaray han maupay nga plano para ha relokasyon han lokal nga gubyerno han Davao City. Wara liwat gintanyag nga kumpensasyon ha mga rurub-on nga balay an kompaniya nga nag-angkon han tuna.

Ha Taguig City, naglansar han gios-protesta an mga residente han Panday Creekside, Barangay Palingon-Tipas ha atubangan han city hall hadton Pebrero 23 agud tipahan an hulga han demolisyon ha ira komunidad. Nananawagan hira ha lokal nga gubyerno nga igrespeto an ira katungod ha kaseguruhan ha pag-ukoy ha Panday Creekside.

Hadton Marso 5, naputos han kabaraka an komunidad ha sakob han SPD Compound, Western Bicutan han tigda nga sinugod an 150 nga tawuhan han Philippine Navy nga mayda kaupod nga pulis ngan mga upisyal han barangay. Nahibaruan han mga residente nga plano magtindog han AFP han baraks para ha Navy ha compound. Aada ha 400 nga pamilya o 2,500 nga residente an mapapalayas, kadam-an upat kadekada na ha lugar.