Mahugot nga ginsusukna han rebolusyunaryo nga katawhan Pilipino an imperyalismo nga US ngan Zionista nga estado han Israel ha waray wantas nga panmomba ha Iran nga gintikangan hadton Pebrero 28. Butaray ini nga pagtamak ha katalwasan han usa nga naglulugaring nga nasud, ngan butaray nga pagtalapas ha naeksister nga internasyunal nga balaud. Ini na an ikaduha nga pag-atake han US ngan Israel ha nasud tikang Hulyo 2025, ha mando han ngaduha pasista nga lurong nga hira Donald Trump han US ngan Benjamin Netanyahu han Israel.

Gamit an mga asintado nga misayl, iginhimo an asasinasyon ha lider ngan narunapulo nga upisyal han gubyerno han Iran. Ginbomba an eskoylahan ha elementarya ha syudad han Minab nga iginkamatay han masobra 160 nga kabataan nga estudyante nga kababayin-an. Gintarget an mga istruktura nga planta nga nukleyar, sugadman an mga bilding han sibilyan nga gubyerno, mga ospital, ngan bisan mga ginpoprotehiran nga pankasaysayan nga lugar (historical site). Masobra 1,000 nga Iranian an nahireport nga napatay ha syahan nga lima kaadlaw han kada oras nga panmomba, nga baga espiho han makarimadima nga pagrumok han Israel ha Gaza ngan henosidyo ha katawhan Palestino.

Aada ha Iran an bug-os nga katungod nga depensahan an kalugaringon hini kontra ha pangatake han US ngan Israel. Nagpalupad ini han kalugaringon nga mga misayl nga nagtarget ha mga base militar han US ha Saudi Arabia, Kuwait, UAE, Bahrain ngan iba pa nga nasud ha Middle East, ngan kontra ha magkalain-lain nga pasilidad han Israel.

An pagsamwak han kalayo han armado nga pingkiay bunga han imperyalista nga agresyon. Mas ginpahiluag pa ini yana han US han ginbomba ngan ginlunod ha baybayon han Sri Lanka an usa nga diri armado nga barko nga nabal han Iran nga binisita ha mga ehersisyo nga nabal nga gindumara han India, masobra 3,200 kakilometro an distansya ha Iran. Naghihinambog hi Trump nga katin han US an ura-ura kadako nga arsenal nga sering niya sadang para ha gerra nga “waray katapusan.” Ginbomba ngan gin-atake liwat han mga tropa nga Israeli an Lebanon ngan ginpalayas an katawhan ha masobra 50 nga bungto, ha katuyuanan nga sakupon an sur nga parte han nasud.

Kanan buwitre an batasan han mga monopolyo kapitalista, labina na an dagko nga kompaniya ha lana, nga ginsisingabot an gerra para tigda nga pahitas-on an presyo han krudo ngan repinado nga lana. Mas grabe nga krisis an hihimuon hini, labina ha mga atrasado nga nasud sugad han Pilipinas. Ginkakabarak-an han masobra duha kamilyon nga Pilipino nga migrante ha Middle East nga sumamwak ngan mag-iha an gerra. Pira kayukot an ginpili nga umuli bisan kun waray pakabuhian nga naghuhulat.

Waray anuman nga yawyaw an makakaghatag rason ha waray wantas nga pagsasabrag han hiluag nga terorismo han US ngan Israel ha Iran. Gintikangan ini han US nga waray katin nga ebidensya ha akusasyon nga an Iran “naghihimo han armas nga nukleyar.” Kapareho ini han buwa nga “armas para ha hiluagan nga destroso” nga hinungdan ha pag-atake han US ha Iraq hadton 2003. Kapareho liwat han gin-imbento ni Trump nga usa nga “narco-terrorist state” an gubyerno nga Venezuela han atakihon ngan bombahon ini hadton Enero 3, ngan ginsikmit an presidente hini nga hi Nicolas Maduro ngan asawa niya nga hi Cilia Flores.

Napostura nga maton an imperyalista nga US nga andam nga atakihon an anuman nga nasud nga diri nasunod ha iya mga dikta. Iginrarakudako ngan iginwawarasiwas hini an “pinakapoderoso nga panmilitar nga pwersa ha bug-os nga nasud” agud paluhuron an tanan ha iya paghahadi-hadian. Iginbubuksas hini nga dako nga kalurungan an maiha na nga iginbabalandra nga “rules-based order” agud gipiton an magkalain-lain nga nasud nga karibal hini. An tinuod, diri magpapapugong an imperyalismo nga US ha anuman nga internasyunal nga balaud o pagsurundon nga diri haum ha iya interes ha ekonomiya ngan heyopulitika.

Ha waray wantas nga pag-atake ha Iran, klaro nga tuyo han imperyalismo nga US nga agawon an kontrol ha riko nga rekurso hini nga lana, nga ikatulo ha pinakadako ha bug-os nga kalibutan. Karuyag ni Trump nga rumkon an gubyerno han Iran nga nadiri nga yumukbo ha karuyagon han monopolyo kapitalista nga Amerikano. Karuyag han US nga ig-imponer an iya poder ha Iran ngan ha bug-os nga Middle East.

An demonyo nga pag-atake han US ha Iran espiho han natikapintas nga sumpakiay han mga imperyalista nga poder. Pagsiko ini han US ha karibal nga China, nga prinsipal nga napalit han lana han Iran. Kaparte ini han duso han imperyalismo nga US nga bag-uhon an mga kaayusan ha kalibutan agud padakuon an karikuhan ngan rekurso nga direkta nga katin hini. Ha butnga han diri masolbar nga krisis han pankalibutan nga sistema nga kapitalista, ginsusunghan han US an mga imperyalista nga sumpakiay ngan ginpapaypayan an mga gerra ha magkalain-lain nga parte han kalibutan.

Kinahanglan suportahan an katawhan han Iran ha pagdepensa ha ira katalwasan ngan katungod ha nasyunal nga pagdedesisyon. Manawagan ha mga trabahador ngan katawhan nga Amerikano ngan Israel nga atuhan ngan ibagsak an mga lurong nga pasista nga hira Trump ngan Netanyahu. Makig-usa ha katawhan han Palestine, Lebanon, Venezuela, Cuba, North Korea, Nicaragua ngan iba pa nga nasud nga gin-gigipit han US. Bug-uson an pinakahiluag nga nagkakaurusa nga prente kontra ha imperyalista nga gerra.

Ibuksas ngan atuhan an operasyon nga disimpormasyon han US nga nagbibiktima ha katawhan Pilipino. Igsalikway an mga buwa nira Trump ngan Netanyahu. Kinahanglan manindugan an katawhan Pilipino kontra ha panmilitar nga panginginlabot han US ha Pilipinas ngan tipahan an paggamit ha nasud para ha pangatake ngan pan-gegerra. Pakusgon an guliat para bungkagon an mga base militar ngan pasilidad han US ha ilarum han EDCA, palayason an mga tropa nga Amerikano ha nasud, tanggalon an mga armas nga gin-iistak hini, ngan tapuson an mapanulsol ngan mapanhibang nga mga war exercises.

Kinahanglan ipakigbisog han katawhan Pilipino an tinuod nga katalwasan tikang ha kontrol ngan panginginlabot han US. An paghahadi ngan pandambong han US ha Pilipinas, kakunsabo an mga lokal nga naghahadi nga klase ngan gamit an AFP komo instrumento han panmuypoy, an prinsipal nga ulang ha pag-uswag han Pilipinas ngan hinungdan han paghimakuri han hiluag nga masa han katawhan.

Kinahanglan ipasulong an nasyunal-demokratiko nga rebolusyon pinaagi prinsipal han armado nga pakig-away agud tapuson an paghahadi han imperyalismo nga US ngan han mga niyutiyo hini ha Pilipinas. Ha pagdaug han panmaihaan nga gerra han katawhan, mahitutukod an gubyerno nga tinuod nga mag-uundong ha nasyunal nga katalwasan. Ini an prinsipal nga amot han katawhan Pilipino ha pakigbisog agud tapuson an imperyalista nga gerra ngan pananalumpigos ha bug-os nga kalibutan.