Nagkaurusa an mga residente han pira nga bungto ha Rizal ngan ha Samar agud tipahan an pagtitindog han mga windmill farms ha ira prubinsya. Ini nga mga proyekto iginduduso han Vena Energy, kompaniya nga nakabase ha Singapore, usa ha pinakadako nga korporasyon ha “renewable energy” ha bug-os nga rehiyon han Asia Pacific.

Ha Rizal, nagprotesta an mga residente han Talim Island, usa nga isla ha butnga han Laguna de Bay, hadton Pebrero 28 agud paundangon an pagtitindog han Talim Wind Power Project ha isla. Sering nira, kinahanglan dagmit nga ipaundang an proyekto tungod kay nagdudurot ini han grabe nga pagbaha ngan pagtimpag han tuna bunga han pagkahibang han kalibungan ngan kabukiran. Nagpapaluyo han proyekto nga windmill an Island Wind Energy Corporation (IWEC), subsidyaryo han Vena Energy.

Sigon ha mga residente, nagtikang hadton 2025 an konstruksyon han proyekto ha kabukiran han isla. Duha katuig antes hini, gintikangan an pagpupulod han mga kahoy komo pangandam para ha konstruksyon. Nagpagawas han manipesto han pagtipa an mga residente han isla ha pangunguna han grupo nga Kasama sa Pangangalaga ng Isla Talim o Kapit sa Talim.

Ha Samar, napugngan han mga residente han Calbayog City an gin-atentar nga pagpatindog han Vena Energy han mga windmill ha sakob han Calbayog Pan-as-Hayiban Protected Landscape (CPHPL), usa nga watershed area nga surok han irimnon nga tubig han syudad.

Hadton Pebrero 24, igin-anunsyo han kompaniya nga diri na ini magtitindog han anuman nga istruktura sugad han windmill ha sakob han CPHPL. Kasunod ini han unom kabulan nga dirudiretso nga pag-insister han mga residente ha kompaniya ngan lokal nga gubyerno tungod ha mapanhibang nga epekto han proyekto ha ira pakabuhi ngan kalibungan. Kalakip dinhi an petisyon nga ginpirmahan han yukut-yukot nga residente han syudad.

Sugadpaman, tinugot pa gihap an lokal nga gubyerno nga igpasarang nala an mga windmill ha mga baryo nga lupgop han mga distrito han Tinambacan ngan Oquendo. Nagtikang na nga magpapirma an kompaniya han “certificate of no objection” (sertipiko han diri pagtipa) ha mga barangay nga nakatalaan nga maapektuhan han proyekto. Atubangan hini, nananawagan an mga grupo ha katawhan nga magin mabinantayon ha mga pag-atentar han Vena Energy nga hibangon an mga kahoy ngan tanum nga surok han pakabuhi han katawhan.