Balbaliw nga inpakita ti umili a Pilipino ti pigsa ken panagkaykaysa laban iti korapsyon ken kinarigat kadagiti naaramid a protesta kagiddan ti pananglagip iti maika-40 anibersaryo ti Panagrukwas ti EDSA idi Pebrero 25. Kadagiti tignay, nakipaset ti nalawa a masa ti mangmangged, mannalon nakurapay iti syudad, kabataan, babbai, tao’t simbaan, manursuro, empleyado ken dadduma pay a demokratiko a sektor.

Kadakkelan ti taripnong ti 12,000 Pilipino, kaadwan ket kabataan, idiay EDSA Shrine iti kanto ti Ortigas Avenue. Iti panangiyuna ti Kilusang Bayan Kontra Kurakot (KBKK), Youth Rage Against Corruption, Bagong Alyansang Makabayan (Bayan), Artikulo XI, Bunyog Pagkakaisa ken Sanlakas, ti awag da: “Tuloy ti Laban iti Korapsyon ken Kinarigat! Amin a Karaman, Rumbeng nga Agsungbat!”

Nakikaykaysa ken dimmar-ay iti panagtitipon da Bishop Gerardo Alminaza, pangulo ti Caritas Philippines ken pangulo ti Catholic Bishops’ Conference of the Philippines Episcopal Commission on Social Action, ni Sr. Mary John Mananzan ti Movement Against Tyranny ken dagiti mammanday-linteg a da Rep. Leila de Lima ti Mamamayang Liberal ken dagiti mangibagi ti Makabayan Bloc.

Saan a napawilan ti martsa a mano a daras a ginandat a harangen dagiti pulis. Iti kangitingitan ti kumprontasyon, dua nga aktibista ti inaresto dagiti pulis, mano nga aldaw nga inbalud da ken pinilaan ti agtutuon a kaso a kriminal.

Saan a bumaba iti 150 nga organisasyon ken 400 indibidwal ti nangiyebkas ti suporta iti aldaw ti tignay. Kuna ti grupo, ti tignay ket “panangipateg iti people power” a kasapulan nga ituloy iti agdama a panawen nangruna ta agraraira pay laeng ti sistemiko a korapsyon, kinarigat ti umili ken panagari dagiti dinastiya ken higante a korapsyon. Iti partikular, palalo a dismayado da nga awan pay laeng ti ti natiliw a “mastermind” iti naibunannag a korapsyon kadagiti flood control project ken dadduma pay a proyekto ti rehimen Marcos.

Umaw-aweng ti pukkaw da tapno pagsungbaten ken pababaen iti pwesto da Ferdinand Marcos Jr ken Sara Duterte iti pannakairaman da iti sistemiko a korapsyon. Inrupir met ti nadumaduma a sektor ti partikular a panawagan a pang-ekonomya ken pangpulitika.

Madi da a makikaykaysa

Iti maysa a paset ti EDSA, insayangkat met dagiti grupo iti sidong ti Trillion Peso March Movement (TPMM) ti maysa a nakasina a tignay nu sadinno a dimmar-ay ti mano a mabigbig a personahe ken artista. Nagkedked ti TPMM, partikular dagiti grupo a SIKLAB, Tindig Pilipinas ken Akbayan Partylist, a sumungbat iti awag dagiti lider ti simbaan ken dadduma pay a grupo a sibiko nga agkaykaysa.

Ti grupo nga Akbayan, iti partikular, ket agkedked kadagiti awag a pagsungbaten ni Marcos ken dagiti upisyal na, iti rason a ni Sara Duterte kano ti makinabang. Dagiti panawagan iti protesta da ket limitado laeng kadagiti gakat a kontra-dinastiya ken dagiti reporma ken lumikliklik da a madakamat man laeng ti nagan ni Marcos—ti ari ti korapsyon. Mabigbig ti Akbayan a kontra kadagiti grupo a nailyan-demokratiko.

Dadduma pay a tignay

Malaksid iti protesta iti EDSA, napasamak dagiti tignay kadagiti prubinsya. Nalatak kadagitoy ti rinibo a nagtignay idiay Baguio City, Iloilo City ken Bacolod City.

Naangay met ti protesta ken aktibidad iti Dagupan City idiay Pangasinan, Angeles City idiay Pampanga, Tuguegarao City idiay Cagayan, Santiago City, Ilagan ken Alicia idiay Isabela, Naga City idiay Camarines Sur, Legaspi City idiay Albay, Kalibo idiay Aklan, Roxas City idiay Capiz, idiay Antique, Tacloban City idiay Leyte, Cebu City, Dumaguete City idiay Negros Oriental, Cagayan de Oro City, Iligan City ken idiay Davao City. Kabayatanna, inyulat met ti simbaan Katoliko ti pannakipaset iti komemorasyon ti dandani 90 diyosesis iti intero a pagilyan.

Iti intero a pagilyan, nagiyaramid ti tignay dagiti migrante a Pilipino idiay Germany, United Kingdom, Italy, the Netherlands, Australia, Canada, US ken Hongkong. Adayo man iti Pilipinas ket aktibo da a makipaspaset tapno pagtalinaeden a sibibiag ti pakasaritaan ken ti anag ti Panagrukwas ti EDSA.