Sadtong Pebrero 26, ginbalabagan sang mga pwersa sang Cuba sa dulunan sang teritoryo nga kadagatan sini ang isa ka speedboat nga may sakay nga 10 ka paramilitar halin sa US. Nagpalupok ang grupo, gani napilitan ang mga Cubano nga magbalos. Apat ang napatay kag anum ang napilasan sa mga ini. Ginkundenar sang Cuba ang pagtilaw nga pagsulod sang mga paramilitar nga may katuyuan nga magsabwag sang terorismo sa isla kag magtuga sang kahangawa sa pumuluyo.

Natabo ang pagtilaw nga pagpanggamo sa tunga sang pagpatuman sang US sang panibag-o nga serye sang mga mapintas nga sangsyon batuk sa Cuba. Sadtong Enero, epektibo nga ginpatuman sang US ang isa ka “oil embargo” kon diin gindumilian sang presidente sini nga si Donald Trump ang tanan nga mga pungsod nga magsuplay sang lana sa Cuba.

Ang pagdingot sang lana gintawag ni Miguel Díaz-Canel, presidente sang Cuba, nga “kriminal, barahubal kag indi makatawo.” Grabe ang epekto sini sa transportasyon, mga ospital kag pasilidad medikal, eskwelahan, turismo, kag produksyon sang pagkaon sang pungsod. Sadtong Pebrero, duha ka beses nga iligal nga ginbalabagan sang coast guard sang US ang pagpalawod sang mga barko nga nagadala sang lana halin sa Mexico kag Venezuela padulong sa Cuba.

Sa tunga sini, nagbubo ang suporta kag pakig-isa sa Cuba. Nagpadala sang tonelada nga suportang materyal ang Mexico, isa sa mga pungsod nga ginpahog sang US sang mas mataas nga taripa kon padayon ini nga magpadala sang lana sa Cuba. Nagpadala man sang ayuda nga materyal, pinansya kag pagkaon ang Chile, Russia, China, Vietnam kag Spain.