Hustisya kag salabton ang panawagan sang mga progresibong grupo kag residente sang Rodriguez, Rizal para sa mga napatay, nadula kag napilasan sa pagtiphag sang tambakan sang basura sa Barangay San Isidro sadtong Pebrero 20.

Natiphag ang ginabana-bana 420,000 metriko kubiko sang basura sa Phase 5 sang Rizal Provincial Sanitary Landfill nga nagasakop sa anum ka ektarya nga duta. Ang tambakan ginapadalagan sang Green Leap Solid Waste Management, Inc, subsidyaryo sang International Solid Waste Integrated Management Specialist Inc.

Suno sa mga residente, indi magnubo sa 100 ka tawo ang naapektuhan sang pagkatiphag, 50 sa ila nareport nga indi makita kag isa ang kumpirmado nga napatay. Ginakundenar sang mga residente ang lubos nga cover-up nga ginahimo sang kumpaniya kag lokal nga gobyerno nga ginapilit nga duha lang ang nadula kag isa ang napatay. Nagapanawagan sila sang imbestigasyon agud matumod ang rason sang pagkatiphag kag kon sin-o ang may salabton diri. Demanda nila ang makatarungan nga suporta sang gobyerno sa mga naapektuhan sang pagkatiphag.

Sadtong Pebrero 12, nagkadto sa tambakan ang Kadamay kag iban pa nga progresibo nga grupo para maglunsar sang protesta kag magsindi sang kandila. Pila ka adlaw ang nagligad, naghapag sang resolusyon sa House of Representatives ang Makabayan Bloc para paimbestigaran ang insidente. Samtang, nagpaguwa sang mando ang Department of Environment and Natural Resources para temporaryo nga ipasira ang tambakan sugod sadtong Pebrero 24.

Antes ang sini lang nga insidente, nareport na diri ang anum ka beses nga pagkatiphag sang tambakan, sunog sadtong Abril 2025 kag pulu-panahon nga pagtagas kag pagbaha sang leachate ukon makahililo nga likido halin sa tambakan.