Sunod-sunod ang pagpalayas sa mga mangunguma kag demolisyon sa imol nga taga-syudad sang mga nagapang-agaw sang duta sa mga bahin sang pungsod.

Sa Zambales, indi magnubo sa 22 ka mangunguma kag ila pamilya ang napalayas tungod sa demolisyon kag pagpang-agaw sang duta sa Purok 3, Barangay Balaybay, Castillejos sadtong Pebrero 23. Suno sa mga mangunguma, may ginauyatan sila nga CLOA halin sa Department of Agrarian Reform para sa 21 ektarya nga duta nga gina-agaw. Pagkatapos ang paglupok sang bulkan Pinatubo sadtong 1991, gin-anunsyo man sang sadto gobernador sang Zambales nga ginahatag sa ila ang kadutaan. Halin pa 1934, ginatikad na sang ila pamilya ang amo nga duta.

Sa Davao City, 600 pamilya ang nawad-an sang balay sang gub-on ang ila komunidad sa Arroyo Compound, Golden Valley, Matina Crossing sadtong Pebrero 27. Madamo nga mga residente ang napilitan nga wasakon ang kaugalingon nga balay agud salbaron ang mga materyales kag ila kagamitan. Ginpatigayon ang demolisyon sa pihak sang kawad-on sang matarong nga plano para sa relokasyon sang lokal nga gobyerno sang Davao City. Wala pa gihapon sang ginatanyag nga kumpensasyon sa mga gulub-on nga mga balay ang kumpaniya nga nagaangkon sa duta.

Sa Taguig City, naglunsar sang hublag-protesta ang mga residente sang Panday Creekside, Barangay Palingon-Tipas sa atubang sang city hall sadtong Pebrero 23 agud pamatukan ang peligro sang demolisyon sa ila komunidad. Nagpanawagan sila sa lokal nga gobyerno nga respetuhon ang ila kinamatarung sa kaseguron sa puluy-an sa Panday Creekside.

Sadtong Marso 5, naputos sang pagkahangawa ang komunidad sa sulod sang SPD Compound, Western Bicutan sang gulpi naglusob diri ang 150 ka tinawo sang Philippine Navy nga may kaupod nga pulis kag mga opisyal sang barangay. Nahibaluan sang mga residente nga plano nga magtukod sang AFP sang baraks para sa Navy sa compound. Mga 400 ka pamilya ukon 2,500 ka residente ang mapalayas, kadam-an apat na ka dekada sa lugar.