Sadtong Pebrero 27, sa pagpanguna sang Samahan ng Maliliit na Mangingisda sa San Miguel Bay (SMB), opisyal nga gintukod ang Tanggol SMB Network sa Barangay Sabang sa Calabanga, Camarines Sur. Tuyo sang alyansa nga pamatukan ang plano nga SMB offshore wind projects. Suno sa alyansa, linibo ka mangingisda ang mawad-an sang palangabuhian tungod sa proyekto. Direkta man nga atake ang proyekto sa seguridad sa pagkaon kag kinamatarung sang pumuluyo para sa rekurso sa dagat.

Sa iban nga banwa sang probinsya, ginapakigbato sang mga mangunguma ang ila kinamatarung sa duta. Sa Barangay San Ramon kag Salvacion, Siruma, naglunsar sang protesta ang ginatos ka mga residente sadtong Pebrero 18 agud kundenaron ang pagpang-agaw sang mga Villafuerte sang ila duta.

Sadtong Pebrero 20, nagiit sang Portico Banasi Household Farmers Association ang ila kinamatarung sa pagpuyo sa ginpatigayon nga kumperensya sa munisipyo sang Bula. Suno sa grupo, imbes nga pamatian sila sang mga tiglawas sang Philippine Commission on Urban Poor kag sheriff sang RTC Branch 31 daw nangin tagpangapin sila sang mga nagapang-agaw sang duta. Wala nagtambong sa kumperensya ang mga tiglawas sang Colarina, Tan kag sang korporasyon nga Ruby Shelters Builders and Development Corporation. Samtang yara sa sinapol, ginabantayan sila sa sulod sang bilding sang mga tinawo sang PNP nga may bitbit nga mga matag-as nga kalibre sang pusil.