Ginlusob kag nagprotesta ang alyansa nga Gabriela sa pungsodnon nga opisina sang Department of Finance sa Pasay City sadtong Marso 4. Ginapawagan nila ang pagbasura sang 12% value added tax (VAT) kag excise tax sa atubang sang wala-puas nga pagsaka sang presyo sang lana.

Antes sini, ginpangunahan sang alyansa ang mga serye sang protesta kontra VAT sang nagligad nga mga semana sa Metro Manila kag pila ka probinsya. Nagpatigayon man sila sang mga asembliya kag porum para talakayon ang VAT. Ginlunsar man sang grupo ang isa ka signature campaign nga target nga makakalap sang 12,000 ka pirma batuk sa VAT.

Suno sa ila, ang 12% VAT dako nga pabug-at sa pumuluyong Pilipino. Ginasilutan kuno sini ang kada Pilipino ilabi na ang mga nanay nga nagatinguha nga paiguon ang sweldo nga sobra ka nubo sang balor sa makabuhi nga lebel.

Liwat nabuhi ang panawagan para sa pagbasura sa VAT sa tunga sang lapnagon nga pagkundenar sang pumuluyo sa mga anomaliya kag korapsyon sang rehimen Marcos. Ginagarnatsar sa korapsyon ang binilyon ka piso nga ginabayad nga buwis sang pumuluyo.

Ang serye sang mga aktibidad sang Gabriela kabahin sang kampanyang “VAT Kakason, Kurakot Pasabton” nga sentro nga tema sang mga protesta sa Pangkalibutanon nga Adlaw sang Kababaehan nga Anakbalhas sa maabot nga Marso 8.