Hugot nga ginabatikos sang rebolusyonaryong pumuluyo nga Pilipino ang imperyalismong US kag ang Zionistang estado sang Israel sa patarasak nga pagpangbomba sa Iran nga ginsugdan sadtong Pebrero 28. Ini lubos nga pagtapak sa sobereniya sang isa ka nagakinaugalingon nga pungsod, kag barahubal nga paglapas sa nagaluntad nga internasyunal nga layi. Ini na ang ikaduha nga pagsalakay sang US kag Israel sa pungsod halin Hulyo 2025, sa mando sa pareho nga pasista nga buang nga sanday Donald Trump sang US kag Benjamin Netanyahu sang Israel.

Gamit ang mga asintado nga misayl, ginpatigayon ang asasinasyon sa lider kag puluan ka mga opisyal sang gobyerno sang Iran. Ginbomba ang primarya nga eskwelahan sa syudad sang Minab nga nagpatay sang masobra 160 ka bata nga estudyante nga babaye. Gin-target ang mga istruktura nga plantang nukleyar, subongman ang mga bilding sang gobyernong sibilyan, mga ospital, kag bisan mga ginaproteksyunan nga pangkasaysayan nga lugar. Masobra 1,000 ka Iranian na ang na-report nga napatay sa una nga lima ka adlaw sang oras-oras nga pagpangbomba, nga daw laragway sang makasiligni nga pagdugmok sang Israel sa Gaza kag henosidyo sa pumuluyong Palestino.

Yara sa Iran ang bug-os nga kinamatarung nga pangapinan ang kaugalingon sini batuk sa pagsalakay sang US kag Israel. Nagpalupad ini sang kaugalingon nga mga misayl nga nag-target sa mga base militar sang US sa Saudi Arabia, Kuwait, UAE, Bahrain kag iban pa nga pungsod sa Middle East, kag batuk sa lain-lain pa nga pasilidad sa Israel.

Ang paglapta sang kalayo sang armadong kagamo amo ang direkta nga bunga sang imperyalistang agresyon. Labi pa ini subong nga ginpalapad sang US sang ginbomba kag ginpalugdang sa baybayon sang Sri Lanka ang isa ka indi armado nga barkong nabal sang Iran nga bisita sa mga ehersisyong nabal nga gin-host sang India, masobra 3,200 kilometro ang kalayuon sa Iran. Nagpahambog si Trump nga uyat sang US ang tuman ka dako nga arsenal nga siling niya bastante para sa gyerang “wala sang katapusan.” Ginbomba kag ginsalakay man sang mga tropa sang Israel ang Lebanon kag ginpalayas ang pumuluyo sa masobra 50 ka banwa, sa katuyuan nga sakupon ang sur nga bahin sang pungsod.

Naga-asta nga bwitre ang mga monopolyo kapitalista, ilabi na ang mga dalagko nga kumpaniya sang lana, nga ginahimuslan ang gyera agud pabutyugon ang presyo sang korudo kag repinado nga lana. Mas malala nga krisis ang tugahon sini, ilabi na sa mga atrasado nga mga pungsod kasubong sang Pilipinas. Ginakahangaw-an sang masobra duha ka milyon ka Pilipino nga migrante sa Middle East nga magalapta kag magadugay ang gyera. Pila ka libo ang nagpili nga magpauli bisan wala sang palangabuhian nga nagahulat sa ila.

Wala sang ano man nga pagtinikal ang makahatag sang katarungan sa patarasak nga pagsabwag sang malapad nga terorismo sang US kag Israel sa Iran. Ginsugdan ini sang US nga wala sang ginauyatan nga ebidensya sa pasibangod nga ang Iran “nagahimo sang armas nukleyar.” Kaangay ini sang peke nga “armas sang malaparan nga pagpamatay” nga rason sa paglusob sang US sa Iraq sadtong 2003. Kaangay man sang gin-imbento ni Trump nga isa ka “narco-terrorist state” ang gobyerno sang Venezuela sang ginlusob kag ginbomba ini sadtong Enero 3, kag gin-abdak ang presidente sini nga si Nicolas Maduro kag asawa niya nga si Cilia Flores.

Nagapostura nga maton ang imperyalismong US nga handa salakayon ang ano man nga pungsod nga indi magsunod sa iya mga dikta. Ginapahambog kag ginawara-wara sini ang “pinakagamhanan nga pwersang militar sa bug-os nga kalibutan” para paluhuron ang tanan sa iya paghari-harian. Ginabuyagyag sini nga dako nga kabulaskugan ang madugay na nga ginabalandra nga “rules-based order” agud ipiton ang lain-lain nga pungsod nga karibal sini. Ang matuod, indi magpapugong ang imperyalismong US sa ano man nga internasyunal nga layi ukon pagsulundan nga wala nagasanto sa iya interes sa ekonomiya kag heyopulitika.

Sa patarasak nga paglusob sa Iran, maathag nga tuyo sang imperyalismong US nga agawon ang kontrol sa manggaran nga rekurso nga lana sini, nga ikatatlo sa pinakadako sa bug-os nga kalibutan. Luyag ni Trump nga dugmukon ang gobyerno sang Iran nga nagapamalibad nga magduko sa kagustuhan sang mga monopolyo kapitalistang Amerikano.Luyag sang US nga ipatuman ang iya gahum sa Iran kag sa bug-os nga Middle East.

Ang yawan-on nga pagsalakay sang US sa Iran laragway sang nagasingki nga banggi-anay sang mga imperyalismong gahum. Pagsiko ini sang US sa karibal nga China, nga mayor nga nagabakal sang lana sang Iran. Kabahin ini sang duso sang imperyalismong US nga bag-uhon ang kaayusan sa kalibutan agud padakuon ang manggad kag rekurso nga direkta nga gina-uyatan sini. Sa tunga sang indi masolbar nga krisis sang pangkalibutanon nga sistemang kapitalista, ginagatungan sang US ang mga imperyalistang banggi-anay kag ginapaypayan ang mga gyera sa lain-lain nga bahin sang kalibutan.

Dapat suportahan ang pumuluyo sang Iran sa pagpangapin sang ila kahilwayan kag kinamatarung sa pungsodnon nga pagbuot. Manawagan sa mga mamumugon kag pumuluyong Amerikano kag Israeli nga pakig-awayan kag ibagsak ang mga buang nga pasistang sanday Trump kag Netanyahu. Makig-isa sa pumuluyo sang Palestine,Lebanon, Venezuela, Cuba, North Korea, Nicaragua kag iban pa nga pungsod nga gina-ipit sang US. Bug-oson ang pinakamalapad nga nagahiliugyon nga prente batuk sa imperyalistang gyera.

Ibuyagyag kag pakig-awayan ang operasyon nga disimpormasyon sang US nga nagabiktima sa pumuluyong Pilipino. Isikway ang mga kabutigan nanday Trump kag Netanyahu. Dapat manindugan ang pumuluyong Pilipino batuk sa pagpasilabot militar sang US sa Pilipinas kag pamatukan ang paggamit sa pungsod sa pagpangsalakay kag pagpang-gyera. Pabaskugon ang singgit para wasakon ang mga base militar kag pasilidad sang US sa idalum sang EDCA, palayason ang mga tropang Amerikano sa pungsod, kuhaon ang mga armas nga ginatambak sini, kag tapuson ang mapanggarit-garit kag mapangwasak nga mga war exercises.

Dapat ipakig-away sang pumuluyong Pilipino ang matuod nga kahilwayan halin sa kontrol kag pagpasilabot sang US. Ang paghari kag pagpangkawkaw sang US sa Pilipinas, kakunsabo ang mga lokal nga nagahari nga sahi kag gamit ang AFP bilang instrumento sang pagpangsumpo, ang nagapanguna nga upang sa pag-uswag sang Pilipinas kag rason sang pag-antus sang malapad nga masa sang pumuluyo.

Dapat isulong ang pungsodnon-demokratiko nga rebolusyon paagi nagapanguna sa armadong paghimakas agud tapuson ang paghari sang imperyalismong US kag sang mga papet sini sa Pilipinas. Sa pagdaog sang pangmalawigon nga inaway banwa, matukod ang gobyerno nga magatib-ong sa pungsodnon nga kahilwayan. Ini ang nagapanguna nga amot sang pumuluyong Pilipino sa paghimakas agud tapuson ang imperyalistang gyera kag pagpamigos sa bug-os nga kalibutan.