Nagabaga-baga ang kaakig sang mga pumuluyo sa Iran kag Middle East sa pagpangbomba sang US-Israel sa Iran nga nagpatay sang madamo nga sibilyan kag nagwasak sang mga imprastruktura. Isa sa ginakaakig nila ang hungod kag duha ka sulit nga pagpangbomba sa isa ka eskwelahan sadtong Pebrero 28 nga nagpatay sang 175, kadam-an mga bata nga babaye edad 7-12.

Sadtong Marso 3, ginatos ka libo nga Iranian ang nagpakigbahin sa prusisyon sa Tehran para ilubong ang mga bata nga babaye. Sa tunga sang ila pagtangis, ginkundenar nila ang mga pagpangbomba sang US kag ginakasubo ang pagkapatay sang ila lider nga si Ali Khamenei. Ginapanawagan nila ang kamatayon para sa imperyalismong US kag Zionistang Israel. Panumpa nila nga itimalos ang pagpatay sa ila mga lider kag kasimanwa. May amo man nga kasubong nga mga hublag sa mga probinsya sa guwa sang Tehran.

Ginapanginwala sang protesta nga ini ang ginapalapnag sang imperyalismong US kag mga gaway sini sa internasyunal nga midya (pati sang lokal nga midya sa Pilipinas) ang binutig nga “nagaselebrar” ang mga Iranian sa pag-atake sa ila gobyerno.

Madamo sa mga pumuluyo sa rehiyon ang akig sa US-Israel kag malig-on nga nagapanindugan para sa sobereniya sang Iran. May mga hublag sa atubang ukon malapit sa embahada sang US sa Iraq, Yemen, Jordan, Turkey, Oman kag Kuwait. May mga protesta nga nagakundenar sa mga pagpangbomba sang US sa India, Pakistan, Japan, kag South Korea. May amo man nga mga protesta sa US, Venezuela kag mga pungsod sa Europe.

Sa Lebanon, aktibo nga nagadepensa ang armadong grupo nga Hezbollah batuk sa panibag-o nga serye sang pagpangbomba sang Israel sa sur nga bahin sini kag sa Beirut.

Sa Pilipinas, nagmartsa padulong sa embahada sang US sa Manila ang mga progresibo nga grupo sa pagpanguna sang Bayan sadtong Marso 3. Ginkundenar nila ang gyerang agresyon sang US-Israel sa Iran kag ginapanawagan ang pagpalayas sang mga base militar sang US sa Pilipinas. Isa ka adlaw antes sini, naglunsar sang protesta bilang pagpakig-isa sa pumuluyo sang Iran ang mga grupong pungsodnon-demokratiko sa Boy Scout Circle sa Quezon City. Nagkadto man sila sa Iran Embassy sa Makati City sadtong Marso 5 agud ipalab-ot sa ambasador ang ila pakig-unong sa kalisod sang pumuluyong Iranian.