Naghugpong ang mga residente sang pila ka banwa sa Rizal kag sa Samar para pamatukan ang pagtukod sang mga windmill farms sa ila probinsya. Ang mga proyekto nga ini ginaduso sang Vena Energy, kumpaniya nga nakabase sa Singapore, isa sa pinakadako nga korporasyon sa “renewable energy” sa bug-os nga rehiyon sa Asia Pacific.

Sa Rizal, nagprotesta ang mga residente sang Talim Island, isa ka isla sa tunga sang Laguna de Bay, sadtong Pebrero 28 agud pauntaton ang pagtukod sang Talim Wind Power Project sa isla. Suno sa ila, dapat gilayon nga pauntaton ang proyekto tungod nagadulot ini sang grabe nga pagbaha kag pagkatiphag sang duta tungod sang pagkaguba sang kapalibutan kag kabukiran. Yara sa likod sang proyektong windmill ang Island Wind Energy Corporation (IWEC), subsidyaryo sang Vena Energy.

Suno sa mga residente, nagsugod sadtong 2025 ang konstruksyon sang proyekto sa kabukiran sang isla. Duha ka tuig antes sini, ginsugdan ang pagpang-utod sang mga puno sang kahoy bilang paghanda para sa konstruksyon. Nagpaguwa sang manipesto sang pagpamatuk ang mga residente sang isla sa pagpanguna sang grupo nga Kasama sa Pangangalaga ng Isla Talim ukon Kapit sa Talim.

Sa Samar, napunggan sang mga residente sang Calbayog City ang pagtilaw nga tukuron sang Vena Energy ang mga windmill sa sulod sang Calbayog Pan-as-Hayiban Protected Landscape (CPHPL), isa ka watershed area nga ginakuhaan sang ilimnon nga tubig sa syudad.

Sadtong Pebrero 24, gin-anunsyo sang kumpaniya nga indi na ini magtukod sang ano man nga istruktura kaangay sang windmill sa sulod sang CPHPL. Sunod ini sang anum ka bulan nga tayuyon nga pag-giit sang mga residente sa kumpaniya kag lokal nga gobyerno tungod sa makahalalit nga epekto sang proyekto sa ila palangabuhian kag kapalibutan. Lakip diri ang petisyon nga ginpirmahan sang linibo ka residente sang syudad.

Apang, nagpasugot pa gihapon ang lokal nga gobyerno nga ilapta na lang ang mga windmill sa mga baryo nga sakop sang mga distrito sang Tinambacan kag Oquendo. Nagsugod na nga magpapirma ang kumpaniya sang “certificate of no objection” (sertipiko nga wala nagapamatuk) sa mga barangay nga natalana nga maapektuhan sang proyekto. Sa atubang sini, nagpanawagan ang mga grupo sa pumuluyo nga mangin mabinantayon sa mga pagtinguha sang Vena Energy nga gub-on ang mga puno kag tanum nga ginakuhaan sang palangabuhian sang pumuluyo.