Agsasaruno ti panagpapanaw ken demolisyon dagiti agaagaw ti daga kadagiti mannalon ken iti nakurapay iti syudad iti nadumaduma a paset ti pagilyan.

Idiay Zambales, saan a bumaba iti 22 mannalon ken pamilya da ti napapanaw gapu iti demolisyon ken panangagaw ti daga iti Purok 3, Barangay Balaybay, Castillejos idi Pebrero 23. Segun kadagiti mannalon, adda ti iggem da a Certificate of Land Ownership Award manipud iti Department of Agrarian Reform para iti 21 ektarya a daga a maag-agaw. Kalpasan ti panagbettak ti bulkan a Pinatubo idi 1991, inyanunsyo met ti dati a gobernador ti Zambales a mait-ited kadakwada ti daga. Manipud pay 1934, suksukayenen ti kaputotan da ti nasao a daga.

Idiay Davao City, 600 pamilya ti naawanan ti balay idi maduprak ti komunidad da iti Arroyo Compound, Golden Valley, Matina Crossing idi Pebrero 27. Adu a residente ti napilitan a dadaelen ti bukod da a balay tapno isalbar dagiti materyales ken alikamen da. Ti demolisyon ket naipatungpal iti laksid ti kinaawan ti nasayaat a plano para iti relokasyon ti lokal a gubyerno ti Davao City. Awan met ti naidiaya a kumpensasyon kadagiti dadaelen ti kumpanya a nangtagikwa iti daga.

Idiay Taguig City, nagisayangkat ti tignay protesta dagiti residente ti Panday Creekside, Barangay Palingon-Tipas iti sango ti city hall idi Pebrero 23 tapno supyaten ti pangta a demolisyon iti komunidad da. Immawag da iti lokal a gubyerno nga irespeto ti karbengan da iti panagindeg iti Panday Creekside.

Idi Marso 5, nagamak ti komunidad iti uneg ti SPD Compound, Western Bicutan idi kellaat a dimmarup ditoy ti 150 tauhan ti Philippine Navy nga addaan kadwa da a pulis ken dagiti upisyal ti barangay. Naamwan dagiti residente ti plano nga agitakder ti AFP ti baraks para iti Navy iti compound. Adda ti 400 pamilya wenno 2,500 a residente ti mapatalaw, a kaadwan ket uppat a dekadan iti lugar.