Iti laksid ti nangato a sweldo ken alawans, adu iti Philippine National Police ti imbwelto kadagiti kriminal nga aktibidad para iti pasuksok ken kwarta. Babaen ti pasista a bileg, kikkikilan, taktakawan ken ab-abusuen dagiti pulis ti ordinaryo nga umili.

Segun mismo iti rekord ti PNP, nasurok 2,500 pulis ti naikkat iti pwesto idi 2025 gapu iti pannakaisangkot da iti linnakwan ti iligal a droga. Idi met Pebrero, pito a pulis ti naibutaktak a nagkikil iti maysa a residente ti Manila kasukat ti panangiyatras ti pinarbo a kaso ti iligal a droga a naipila laban kenkwana. Idiay Angono, Rizal, 10 pulis ti nagimula ti ebidensya, nagbugbog, nagtakaw ken nagkikil iti maysa nga estudyante nga inakusaran da a sangkot iti linnakwan ti iligal a droga. Dua a bulan isuna nga iligal a naibalud uray nangted ti kwarta ti pamilya na. Kabayatanna, innem a pulis idiay Makati ti naibunannag a sangkot iti serye dagiti panagkikil ken panagtakaw iti syudad.

Dagitoy ket sumagmamano laeng iti naparang a pammaneknek iti natural a pasista ken managabuso a karakter ti kapulisan. Agtultuloy nga agraira ti kultura ti kinadangkes iti uneg daytoy.