Agburburek ti pungtot ti umili iti Iran ken Middle East iti panagbomba ti US-Israel iti Iran a nangpatay ti adu a sibilyan ken nangdadael kadagiti imprastruktura. Maysa kadagiti kaunget da la unay ket ti ingagara ken dua a daras a panagbomba iti maysa nga eskwelaan idi Pebrero 28 a pimmatay ti 175, kaadwan ket ubbing a babbai nga agtawen 7-12.

Idi Marso 3, ginasut a ribo nga Iranian ti dimmar-ay iti prusisyon dagiti ubbing a babbai idiay Tehran. Iti tengnga ti leddaang da, kinundenar da dagiti panagbomba ti US ken nagladingit da iti pannakatay ti lider da a ni Ali Khamenei. Inyawag da ti pannakatay ti imperyalismo a US ken Zionista nga Israel. Insapata da nga ibales da ti panangpatay iti lider ken kakailyan da. Napasamak ti kapada a tignay kadagiti prubinsya ruar iti Tehran.

Naibunannag kadagitoy a protesta nga inuulbod ti ipaspasaknap ti imperyalismo a US ken kadagiti gamat daytoy iti internasyunal a midya (uray ti lokal a midya iti Pilipinas) nga “agramrambak” dagiti Iranian iti panagatake iti gubyerno da.

Adu kadagiti umili iti rehiyon ti gumurgura iti US-Israel ken natibker a tumaktakder para iti soberanya ti Iran. Naangay dagiti tignay iti sango wenno asideg iti embahada ti US iti Iraq, Yemen, Jordan, Turkey, Oman ken Kuwait. Adda dagiti protesta a mangkunkundenar ti panagbomba ti US idiay India, Pakistan, Japan ken South Korea. Adda dagiti kapada a protesta idiay US, Venezuela ken kadagiti pagilyan idiay Europe.

Idiay Lebanon, aktibo nga agdepdepensa ti armado a grupo a Hezbollah laban iti baro a serye ti panagbomba ti Israel iti abagatan a paset daytoy ken iti Beirut.

Iti Pilipinas, nagmartsa agturong ti embahada ti US idiay Manila dagiti progresibo a grupo iti panangiyuna ti Bayan idi Marso 3. Kinundenar da ti gera nga agresyon ti US-Israel idiay Iran ken inyawag da ti panagpanaw dagiti base militar ti US iti Pilipinas. Maysa nga aldaw sakbay daytoy, nagisayangkat dagiti grupo a nailyan-demokratiko ti protesta kas pannakikaykaysa iti umili ti Iran iti Boy Scout Circle idiay Quezon City. Napan da met iti Iran Embassy idiay Makati City idi Marso 5 tapno ipadanon iti ambasador ti pannakipagladingit da iti umili nga Iranian.