Nagkaykaysa dagiti residente ti mano nga ili idiay Rizal ken Samar tapno supyaten ti panagitakder kadagiti windmill farms iti prubinsya da. Dagitoy a proyekto ket idurduron ti Vena Energy, kumpanya a nakabase idiay Singapore, maysa kadagiti kadakkelan a korporasyon iti “renewable energy” iti intero a rehiyon ti Asia Pacific.

Idiay Rizal, nagprotesta idi Pebrero 28 dagiti residente ti Talim Island, maysa nga isla iti tengnga ti Laguna de Bay, tapno ipasardeng ti panagitakder ti Talim Wind Power Project iti isla. Kunada, nasken a dagus nga ipasardeng ti proyekto gapu ta mangituntunda daytoy ti nakaro a panaglayus ken panagreggaay ti daga gapu iti pannakadadael ti kalikasan ken kabanbantayan. Ti Island Wind Energy Corporation (IWEC) a subsidyaryo ti Vena Energy ti adda iti likod ti proyekto a windmill.

Segun kadagiti residente, nangrugi idi 2025 ti konstruksyon ti proyekto iti kabanbantayan ti isla. Dua a tawen sakbay daytoy, narugyan ti panagpukan ti kaykayo kas panagsagana iti konstruksyon. Nagiruar ti manipesto ti panagsupyat dagiti residente ti isla iti panangiyuna ti grupo a Kasama sa Pangangalaga ng Isla Talim wenno Kapit sa Talim.

Idiay Samar, nalapdan dagiti residente ti Calbayog City ti gandat a panangitakder ti Vena Energy kadagiti windmill iti uneg ti Calbayog Pan-as-Hayiban Protected Landscape (CPHPL), maysa a watershed area a pagtataudan ti danum nga inumen ti syudad.

Idi Pebrero 24, inyanunsyo ti kumpanya a saan nga agitakder daytoy ti anyaman nga istruktura kas ti windmill iti uneg ti innem a bulan a tuluy-tuloy a panangirupir dagiti residente iti kumpanya ken lokal a gubyerno gapu iti makadadael nga epekto ti proyekto iti pagbiagan da ken iti aglawlaw. Kabilang ditoy ti petisyon a pinirmaan ti rinibo a residente ti syudad.

Nu pay kasta, inpalubos latta ti lokal a gubyerno nga iwaras laengen dagiti windmill kadagiti baryo a saklaw dagiti distrito ti Tinambacan ken Oquendo. Nangrugin nga agpapirma ti kumpanya ti “certificate of no objection” (sertipiko ti saan a pangkedked) kadagiti barangay a maapektaran ti proyekto. Iti sango daytoy, umaw-awag dagiti grupo iti umili nga agbalin a managbantay kadagiti gandat ti Vena Energy a dadaelen dagiti kayo ken mula a pagatataudan ti pagbiagan ti umili.