Nainget a kunkundenaren ti rebolusyonaryo nga umili a Pilipino ti imperyalismo a US ken ti Zionista nga estado ti Israel iti narungsot a panagbomba iti Iran a rinugyan da idi Pebrero 28. Daytoy ket agdadata a panangrabngis iti independensya ti agwaywayas a pagilyan ken awanan-bain a panaglabsing iti agraraira nga internasyunal a linteg. Daytoyen ti maikadwa a panagraut ti US ken Israel iti pagilyan manipud Hulyo 2025, iti mandar ti agpada a pasista a mauyong a da Donald Trump ti US ken Benjamin Netanyahu ti Israel.

Usar dagiti asintado a misayl, inyaramid da ti asasinasyon iti pangulo ken mano pulo nga upisyal ti gubyerno ti Iran. Binomba da ti eskwelaan nga elementarya iti syudad ti Minab a nakatayan ti nasurok 160 ubbing a babbai nga estudyante. Pinuntirya da dagiti istruktura a planta a nukleyar, kasta met dagiti pasdek ti gubyerno a sibilyan, dagiti ospital ken uray dagiti maay-aywanan nga istoriko a lugar. Nasurok 1,000 nga Iranian ti naiyulaten a napatay iti umuna a lima nga aldaw ti inoras a panagbomba, a sarming ti nakaam-ames a panangrebbek ti Israel iti Gaza ken henosidyo iti umili a Palestino.

Adda iti Iran ti sibubukel a karbengan a salakniban ti bagbagi daytoy laban iti panagraut ti US ken Israel. Nagpatayab daytoy kadagiti bukod na a misayl a nangpuntirya kadagiti base militar ti US idiay Saudi Arabia, Kuwait, UAE, Bahrain ken dadduma pay a pagilyan iti Middle East, ken laban iti nadumaduma a pasilidad idiay Israel.

Ti panagramaram ti apoy ti armado a risiris ket bin-ig a bunga ti imperyalista nga agresyon. Ad-adda pay a pinalawa ti US ti binnusor idi binomba ken pinalned na iti baybay ti Sri Lanka ti maysa a saan nga armado a barko a nabal ti Iran a bisita kadagiti ehersisyo a nabal a linuktan ti India, iti nasurok 3,200 kilometro a kaadayo iti Iran. Agpalpalastog ni Trump nga iggem ti US ti nakadakdakkel nga arsenal a kunana nga makaanay para iti gera nga “awan gibus na.” Binomba ken rinaut met dagiti tropa nga Israeli ti Lebanon ken pinagtalaw da ti umili iti nasurok 50 nga ili, iti gagem a sakupen ti abagatan a paset ti pagilyan.

Dagiti monopolyo kapitalista, nangruna dagiti dadakkel a kumpanya ti langis ket kas buwitre, a nanggundaway iti gera tapno patayoken ti presyo ti krudo ken repinado a langis. Ad-adda pay na nakaro a krisis ti parnuayen daytoy. Pagam-amakan ti nasurok dua a milyon a Pilipino a migrante idiay Middle East nga agramaram ken agpaut ti gera. Mano ribo ti nangpili nga agawid uray awan ti pagbiagan nga agur-uray kadakwada.

Awan ti anyaman a buladas ti mangikalintegan iti nasaknap a terorismo nga imulmula ti US ken Israel idiay Iran. Rinugyan daytoy ti US nga awanan ebidensya iti alegasyon a ti Iran ket “agar-aramid ti armas nukleyar.” Kapada daytoy ti ubbaw nga “armas ti nasaknap a panagperdi” a rason iti panagraut ti US idiay Iraq idi 2003. Kas met ti inimbento ni Trump a maysa a “narko-terorista nga estado” ti gubyerno ti Venezuela idi rinaut ken binomba na daytoy idi Enero 3, ken dinukot na ti presidente da a ni Nicolas Maduro ken ti asawa na a ni Cilia Flores.

Ti imperyalismo a US ket agpospostura a maton a nakasagana a rumaut iti anyaman a pagilyan a saan a sumurot iti diktar na. Ipanpannakkel ken iwaswasiwas na ti “kabilegan a pwersa militar iti intero a lubong” tapno pagrukmaen ti amin iti panagari-ari na. Iparparang daytoy ti kinaipokrito ti nabayagen nga ibalbalandra na a “rules-based order” tapno ipiten ti nadumaduma a karibal na a pagilyan. Kinapudno na, saan nga agpalapped ti imperyalismo a US iti anyaman nga internasyunal a linteg wenno pagannurotan a saan a maitunos iti interes na iti ekonomya ken heyopulitika.

Iti nadamsak a panagraut iti Iran, nalawag a panggep ti imperyalismo a US nga agawen ti kontrol iti nabaknang a rekurso ti langis daytoy, a maikatlo kadagiti kadakkelan iti intero a lubong. Gagem ni Trump a rebbeken ti gubyerno ti Iran nga agkedkedked nga agrukma iti kayat dagiti monopolyo kapitalista nga Amerikano. Kayat ti US nga ipataw ti bileg na iti Iran ken intero a Middle East.

Ti nadangkes a panagraut ti US idiay Iran ket sarming ti kumarkaro a risiris dagiti imperyalista a bileg. Daytoy nga addang ket panangsiko ti US iti karibal na a China, a kangrunaan a gumatgatang ti langis idiay Iran. Paset daytoy ti duron ti imperyalismo a US a baliwan ti urnos ti sangalubongan tapno padakkelen ti kinabaknang ken rekurso a direkta nga iggem na. Iti tengnga ti saan a marisut a krisis ti sangalubongan a sistema a kapitalista, rubrubroban ti US dagiti imperyalista a binnusor ken probprobokaren na dagiti gera iti nadumaduma a paset ti lubong.

Rumbeng a suportaran ti umili ti Iran iti panangsalaknib iti wayawaya ken karbengan da iti nailyan a pangngeddeng. Umawag kadagiti mangmangged ken umili nga Amerikano ken Israeli a labanan ken ibagsak dagiti mauyong a pasista a da Trump ken Netanyahu. Makikaykaysa iti umili ti Palestine, Lebanon, Venezuela, Cuba, North Korea, Nicaragua ken dadduma pay a pagilyan nga ip-ipiten ti US. Buklen ti kalawaan a nagkaykaysa a prente laban iti imperyalista a gera.

Ibunannag ken labanan ti operasyon a disimpormasyon ti US ang mangbikbiktima iti umili a Pilipino. Iwaksi dagiti inuulbod da Trump ken Netanyahu. Rumbeng a tumakder ti umili a Pilipino laban iti interbensyon a militar ti US iti Pilipinas ken supyaten ti panagaramat iti pagilyan para iti panagraut ken panaggubat. Papigsaen ti pukkaw tapno dupraken dagiti base militar ken pasilidad ti US iti sidong ti EDCA, papanawen dagiti tropa nga Amerikano iti pagilyan, ikkaten dagiti armas nga iyim-imbak na ditoy ken gibusan dagiti managprobokar ken managdadael a war exercises.

Kasapulan nga ilaban ti umili a Pilipino ti pudno a wayawaya manipud iti kontrol ken pannakibiang ti US. Ti panagari ken panagsamsam ti US iti Pilipinas, kakumplot dagiti lokal nga agar-ari a dasig ken panangusar iti AFP kas instrumento ti represyon, ti kangrunaan a tubeng iti panagdur-as ti Pilipinas ken makagapu ti panagrigat ti nalawa a masa ti umili.

Nasken nga iyabante ti nailyan-demokratiko a rebolusyon kangrunaan babaen ti armado a dangadang tapno gibusan ti panagari ti imperyalismo a US ken dagiti aso-aso daytoy iti Pilipinas. Iti panagballigi ti naunday a gubat ti umili, maibangon ti gubyerno a mangitandudo iti nailyan a wayawaya. Daytoy ti kangrunaan nga maibingay ti umili a Pilipino iti dangadang tapno gibusan ti imperyalista a gera ken panangidadanes iti intero a lubong.