Hustisya ken sungsungbatan ti awag dagiti progresibo a grupo ken residente ti Rodriguez, Rizal para kadagiti pimmusay, mapukpukaw ken nadangran iti panagreggaay ti tambakan ti basura idiay Barangay San Isidro idi Pebrero 20.

Nargaay ti mapatta-patta a 420,000 metriko kubiko ti basura iti Phase 5 ti Rizal Provincial Sanitary Landfill a sumaksaklaw iti innem nga ektarya a daga. Ti tambakan ket patpatarayen ti Green Leap Solid Waste Management, Inc, subsidyaryo ti International Solid Waste Integrated Management Specialist Inc.

Segun kadagiti residente, saan a bumaba iti 100 katao ti naapektaran ti panagreggaay, 50 kadakwada ket naiyulat a mapukpukaw ken maysa ti kumpirmado a natay. Kinundenar dagiti residente ti agdadata a panangkalub ti kumpanya ken lokal a gubyerno nga ipilpilit da a dua laeng ti mapukpukaw ken maysa ti natay. Inyawag da ti imbestigasyon tapno matudo ti rason ken nu siasino ti agsungbat ditoy. Kiddaw da met ti nainkalintegan a suporta ti gubyerno kadakwada kadagiti naapektaran iti panagreggaay.

Idi Pebrero 22, napan idiay tambakan ti Kadamay ken dadduma pay a progresibo a grupo tapno agisayangkat ti protesta ken agitugkel ti kandila. Kalpasan ti mano nga aldaw, nagidatag ti resolusyon iti House of Representatives ti Makabayan Bloc tapno paimbestigaran ti insidente. Kabayatanna, nagiruar ti mandato ti Department of Environment and Natural Resources tapno temporaryo nga iparikep ti tambakan manipud Pebrero 2024.

Sakbay ti nabiit pay nga insidente, naiyulaten ti innem a daras a panagreggaay iti tambakan, puor idi Abril 2025 ken pana-panawen a panagtagas ken panaglayus ti leachate wenno makasabidong a likido manipud iti tambakan.