Dimmarup ken nagprotesta ti alyansa a Gabriela iti nailyan nga upisina ti Department of Finance idiay Pasay City idi Marso 4. Inyawag da ti panangibasura iti 12% value-added tax (VAT) ken excise tax iti sango ti awan sarday a panagngato ti presyo ti langis.

Sakbay daytoy, inyuna ti alyansa dagiti serye ti protesta kontra VAT kadagiti napalabas a lawas idiay Metro Manila ken sumagmamano a prubinsya. Nagiyaramid da met kadagiti asembliya ken porum tapno talantanen ti VAT. Insayangkat met ti grupo ti maysa a signature campaign a target a makakalap ti 12,000 pirma laban iti VAT.

Kunada, ti 12% VAT ket dakkel a padagsen iti umili a Pilipino. Dusdusaen kano daytoy ti tunggal Pilipino nangruna dagiti inna a mangikagkagumaan a paganayen ti sweldo nga adayo a nababa iti balor ti makabiag a tukad.

Balbaliw a nabiag ti awag para iti panangibasura iti VAT iti tengnga ti nasaknap a panagkundenar ti umili kadagiti anomalya ken korapsyon ti rehimen Marcos. Magasgastar iti korapsyon ti binilyon a piso nga ibaybayad a buwis ti umili.

Ti serye dagiti aktibidad ti Gabriela ket paset ti kampanya a “VAT Tanggalin, Kurakot Panagutin” a sentro a tema dagiti protesta iti Sangalubongan nga Aldaw ti Babbai nga Anakling-et iti umay a Marso 8.