Aktibo nga agiyeb-ebkas ti panagsupyat dagiti konseho ti estudyante manipud kadagiti pribado nga unibersidad iti intero a pagilyan laban kadagiti gakat a panagngato ti matrikula ken dadduma pay a babayadan (tuition and other fees increase wenno TOFI) iti akademiko a tawen ti 2026-2027. Nagisayangkat da kadagiti sarbey, panagsukisok, petisyon, dayalogo, protesta ken sangsangkamaysa a tignay kadwa da dagiti estudyante iti uneg ti kampus.

Inyuna ti National Union of Students of the Philippines (NUSP) ti kampanya kontra TOFI iti nailyan a saklaw. Idi Enero, indatag ti grupo ti 5-punto a kadawatan: 0% TOFI, panangipatungpal ti moratoryum iti TOFI, panangibasura iti dadduma pay a babayadan, transparency wenno panangilukat ti pinansya dagiti unibersidad ken nangatngato a badyet iti pangpubliko nga edukasyon.

Binatikos ti NUSP ti maulit-ulit a panangikalintegan dagiti unibersidad para iti TOFI kabilang ti ngumatngato a gastos iti edukasyon, panangpadur-as kadagiti pasilidad ken nangatngato a sweldo para kadagiti manursuro ken empleyado. Kuna ti grupo, iti pakasaritaan ti agsasaruno a panagngato ti matrikula ket saan met a makalaklak-am ti nasaysayaat a serbisyo iti kampus dagiti estudyante ken saan met a ngumatngato ti sweldo dagiti manursuro ken empleyado.

Idiay Cordillera, timmakder dagiti estudyante ken konseho ti estudyante iti gakat a TOFI iti Saint Louis University (SLU), University of Baguio (UB) ken University of the Cordilleras. Idi Pebrero 27, nagprotesta dagiti estudyante ti SLU ken naiduron ti administrasyon a pababaen ti immuna a gakat a 6.5% a panagngato iti dadduma pay a babayadan agturong ti 5.5% a panagngato bayat nga awan ti gakat para iti matrikula. Nakaala da met ti pirma ken suporta iti manipesto manipud iti 46 organisasyon ken nasurok 1,200 estudyante.

Iti didiay met laeng nga aldaw, nagtignay dagiti estudyante ti UB laban iti gakat a 10% TOFI ti administrasyon. Nakaurnong ti suporta iti petisyon kontra TOFI iti unibersidad manipud iti 11 organisasyon ken 273 estudyante. Nakidayalogo met dagiti konseho ti estudyante manipud iti SLU ken UB iti CHED-Cordillera Administrative Region idi Pebrero 26.

Idiay Metro Manila, naipangabak dagiti estudyante ti De La Salle Unviversity (DLSU) ken University of the East ti laban kontra TOFI. Inyanunsyo ti agpada nga unibersidad a saan nga agipatungpal daytoy ti TOFI. Resulta daytoy ti awan sarday a kampanya ken tignay dagiti estudyante, konseho ti agad-adal ken dagiti progresibo a grupo manipud pay idi 2025.

Idiay Cavite, naiduron dagiti estudyante ti DLSU-Dasmariñas ti administrasyon a saanen nga agisingasing ti panagngato pay iti matrikula bayat nga adda pay ti baro a konsultasyon para iti posible a panagngato ti dadduma pay a babayadan iti unibersidad.

Idiay Cebu, sinupyat dagiti estudyante ti University of San Carlos ken Cebu Institute of Technology-University (CIT-U) ti TOFI. Idi Pebrero 25, nagisayangkat ti martsa iti kampus idiay Talamban dagiti taga-USC laban iti 6.7% TOFI. Imbes a denggen ken agiyaramid ti dayalogo, naharas ken nagandat a pawilan ti protesta. Kabayatanna, idiay CIT-U, naipaawag ken napangtaan ti suspensyon dagiti estudyante a nangiyuna ken nagpirma iti manipesto kontra TOFI.

Tinawen tunggal Pebrero, umaw-awat ti Commission on Higher Education (CHED) kadagiti petisyon para iti gakat a TOFI. Daytoy a “karbengan” tapno agipangato ti singir ket umannurot iti CHED Memorandum Order No. 03 Series of 2012. Idi Pebrero 28, upisyalen a nagleppas ti tukad ti “konsultasyon” kas paset ti proseso ti panagngato ti singir. Adda tattan iti ima ti CHED dagiti aplikasyon ken ti desisyon nu palubosan daytoy ti TOFI—nga iti pakasaritaan ket nakakidem a palpalubosan daytoy.

Iti laksid dagiti ligal a rekisito” para iti “konsultasyon,” adu nga unibersidad ti saan a sumursurot ditoy. Kanaig daytoy, immawag ti NUSP kadagiti konseho ken estudyante nga ibunannag ti nagbalin a proseso ti konsultasyon—panagsaur, panangipit, limitado a panagpadar-ay wenno agdadata a saan a panangikaskaso ditoy. Inallukoy met isuda ti grupo nga agipatulod ti petisyon iti CHED tapno umapela laban iti TOFI kas paset ti sumaruno a tukad ti proseso.

Iti sango ti ad-adda pay a panagngato ti presyo dagiti basaran a gagatangen, nainkalintegan a labanan dagiti estudyante ken dagiti nagannak da ti nayon a matrikula ken dadduma pay a babayadan. Iti agdama, adda iti abereyds a ₱130,000 ti kasapulan iti tinawen tapno makaadal ti maysa nga estudyante iti kolehiyo. Adda ti tantya a dumandanon iti ₱2 milyon ti kasapulan a gastusen tapno makaturpos iti maysa a 4-tawen a kurso iti kolehiyo kadagiti mayor nga unibersidad ti pagilyan.