Idi Pebrero 27, iti panangiyuna ti Samahan ng Maliliit na Mangingisda sa San Miguel Bay (SMB), upisyal a nabuangay ti Tanggol SMB Network iti Barangay Sabang idiay Calabanga, Camarines Sur. Panggep ti alyansa a supyaten ti plano nga SMB offshore wind projects. Segun iti alyansa, rinibo a mangngalap ti maawanan ti pagbiagan gapu iti proyekto. Ti proyekto ket direkta met nga atake iti seguridad ti taraon ken karbengan ti umili para iti rekurso ti baybay.

Iti dadduma nga ili iti prubinsya, ilablaban dagiti mannalon ti karbengan da iti daga. Kadagiti barangay ti San Ramon ken Salvacion iti ili ti Siruma, nagisayangkat ti protesta ti ginasut a residente idi Pebrero 18 tapno kundenaren ti panagkamkam dagiti Villafuerte iti daga da.

Idi Pebrero 20, nairupir ti Portico Banasi Household Farmers Association ti karbengan da iti panagindeg iti naangay a kumperensya iti munisipyo ti Bula. Segun iti grupo, imbes a denggen isuda dagiti mangibagi ti Philippine Commission on Urban Poor ken sheriff ti RTC Branch 31 ket nagbalin da nga arig na salaknib dagiti agaagaw ti daga. Saan a dimmar-ay iti kumperensya dagiti mangibagi ti Colarina, Tan ken ti korporasyon a Ruby Shelters Builders and Development Corporation. Bayat a maang-angay ti kumperensya, banbantayan isuda dagiti tauhan ti PNP a nakaawit ti nangangato a kalibre ti paltog iti uneg ti pasdek.