Idi Pebrero 26, hinarang dagiti pwersa ti Cuba iti nagbeddengan iti teritoryo a pangbaybay daytoy ti maysa mga speedboat nga addaan lugan a 10 a paramilitar manipud iti US. Nagpaputok ti grupo, isu a napilitan dagiti Cubano nga agbales. Uppat ti natay ken innem ti nasugatan kadagitoy. Kinundenar ti Cuba ti gandat a panagserrek dagiti paramilitar nga addaan panggep nga agimula ti terorismo iti isla ken mangitunda ti riribuk iti umili.

Napasamak ti gandat a panagriribuk iti tengnga ti panangipataw ti US ti baro a serye ti nauulpit a sangsyon laban iti Cuba. Idi Enero, epektibo nga inpatungpal ti US ti maysa nga “oil embargo” nu sadinno a pinaritan ti presidente daytoy a ni Donald Trump ti amin a pagilyan nga agisuplay ti langis iti Cuba.

Ti panangipaidam ti langis ket inawagan ni Miguel Díaz-Canel, presidente ti Cuba, a “kriminal, garapalan ken saan a makatao.” Nakaro ti epekto daytoy iti transportasyon, dagiti ospital ken pasilidad medikal, eskwelaan, turismo ken produksyon ti taraon ti pagilyan. Idi Pebrero, dua a daras nga iligal a hinarang ti coast guard ti US ti panaglayag dagiti barko nga agip-ipan ti langis manipud iti Mexico ken Venezuela agturong idiay Cuba.

Iti tengnga daytoy, bimmuyat ti suporta ken pannakibinnadang iti Cuba. Nagipatulod ti tone-tonelada a suporta a materyal ti Mexico, maysa kadagiti pagilyan a pinangtaan ti US ti nangatngato a taripa nu agtuloy nga agipatulod daytoy ti langis iti Cuba. Nagipatulod met ti ayuda a materyal, pinansya ken taraon ti Chile, Russia, China, Vietnam ken Spain.