Kadagitoy napalabas a mano nga aldaw, dinarup ti sumagmamano a maka-US a pulitiko ken upisyal ti rehimen US-Marcos dagiti upisyal ti embahada ti China iti Pilipinas, nga inakusaran da a “saan a nasayaat a bisita” ken “mannakibiang.” Bayat a naala daytoy ti atensyon ti publiko, naulimek nga agdakdakiwas dagiti pwersa a nabal ken militar ti US iti pagilyan, iti tuluy-tuloy a panagpapigsa ti pwersa militar na iti daga ken kabaybayan iti aglikmot ti Pilipinas.

Bimtak ti nabara a sinnupyat kalpasan nga agipasaknap ni Cmdr. Jay Tarriela, pannakangiwat ti Philippine Coast Guard-West Philippine Sea (PCG-WPS) ti imahe a nanglais iti lider ti China, kaniwas kadagiti pagrukodan ti panagririnnaem dagiti pagilyan. Pinarnuay na ti napigsa a reaksyon dagiti upisyal ti China, a nagaramat met ti nadadagsen a sarita tapno dawaten a mapatawan ti addang a pangdisiplina ti upisyal ti PCG.

Dagiti aksyon ni Tarriela ket kalkulado tapno probokaren ti China. Inaramid na daytoy maysa nga aldaw sakbay a maangay ti “bilateral consultation,” maysa a dayalogo a linuktan ti China idiay Xiamen City. Bin-ig a papel ni Tarriela ti panangpaypay ti antagonismo laban iti China, manipud idi naituding isuna a tagapagsarita ti PCG-WPS idi 2023, kasaruno ti panagsanay na idiay Washington.

Sinuportaran isuna ti sumagmamano a senador iti panangiyuna ni Sen. Risa Hontiveros. Napapirma na ti 15 senador iti resolusyon tapno babalawen ti China, kagiddan ti sayangguseng ti mano a senador nga ideklara a “persona non grata” ti upisyal ti embahada daytoy. Arig na pupuoran dan ti rangtay ti diplomasya.

Ni Hontiveros ket mabigbig nga Amboy ken sugsog ti sentimyento nga anti-China. Kamkamaten na ti suporta ti US para iti ambisyon iti 2028. Pammarang laeng ti inaramid na ken ti Senado a “panangsalaknib iti soberanya” iti panangbatikos iti China. Nagulimek ti Senado iti panagpirma ti Philippines-Japan Acquisition and Cross-Servicing Agreement idi Enero 15. Idi 2024, pinagsingkedan daytoy ti Reciprocal Access Agreement (RAA). Agpada daytoy nga agdadata a panangrabngis iti panagwaywayas ti pagilyan a mangmangted iti militar ti Japan ti wayawaya a sumrek-rumwar iti pagilyan, a paset ti papel daytoy kas kabadang ti US iti estratehiya a “first island chain” tapno palikmutan ti China.

Uray naminsan ket saan a kolektibo a timmader ti Senado laban iti umad-adu a base militar ti US iti Pilipinas iti sidong ti EDCA wenno laban kadagiti sikreto a pasilidad ti US idiay Palawan, Ilocos, Aurora, Cagayan ken dadduma pay a lugar, wenno laban iti panagpakat ti US kadagiti long-range missile ken dadduma pay nga armas a panggubat daytoy kadagiti limed a lokasyon iti pagilyan. Naulimek daytoy iti panagserrek ken panaglayag dagiti barko a panggubat ti US iti teritoryo iti kabaybayan ken panagsuksok daytoy kadagiti nagbabaetan dagiti isla ti Pilipinas, ken iti panag-angkla dagiti higante a barko a nabal ti US iti kabaybayan nga eksklusibo ti pagilyan.

Saan da met a konkontraen ti tuluy-tuloy a panagsagana ti US ti gera ken panagpakat ti umad-adu a ramit ken tropa a militar iti Pilipinas. Saan a nagsarita daytoy laban iti balak ti US nga “ilako” iti Taiwan dagiti EDCA site ti US iti Pilipinas, wenno ti plano nga usaren ti Davao Gulf kas “refuelling hub” tapno agserbisyo kadagiti pwersa a nabal ti US. Nakakaem met ti bibig ti Senado iti plano nga itakder ti pabrika ti bala idiay Subic nga agbalin a paset ti plano ti US nga usaren ti pagilyan a base ti operasyon a panggera daytoy iti Asia.

Bayat nga agbasbassawang kontra iti China ti sumagmamano a pulitiko ken upisyal ni Marcos, naulimek nga intakder ti US ti baro nga Army Rotational Force-Philippines, iti sidong ti Task Force Philippines na. Kabinnadang ti AFP ken pwersa militar dagiti alyado na a pagilyan, iyaramid da manen dagiti baro a maniobra iti kabaybayan a sakop ti exclusive economic zone ti Pilipinas.

Bayat nga iti Pilipinas ket kimmaro dagiti tirada a kontra-China pabor iti US, iti sangalubongan ket pimmigsa dagiti panagbatikos iti imperyalismo a US. Daytoy ket kalpasan a rinaut na ti Venezuela ken dinukot ti presidente da a ni Nicolas Maduro ken ti asawa na a ni Cilia Flores. Pinasarunuan daytoy ti deklarasyon nga agawen ti US ti pagilyan a Greenland, dagiti pangta iti Mexico, Colombia ken Panama, panangprobokar ti gulo kagiddan dagiti pangta ti panagraut iti Iran ken pinainget a panaglipit iti Cuba ken dagiti pagilyan a makigaygayyem wenno makilinlinnako ditoy.

Inbunannag dagitoy ti kinaubbaw ti ibagbaga ti US nga “international rules-based order.” Inlawag ti mauyong a pasista a ni Trump nga “America First” wenno interes ti US ti pudno nga adda iti likod daytoy, iti panagap-apura nga agawen ti kontrol kadagiti pagtataudan ti langis ken naata a materyales iti nadumaduma a paset ti lubong. Tapno saan a maigalut iti internasyunal a linteg, pakpakapsuten na ti United Nations babaen ti panagruar kadagiti komisyon daytoy ken saan a panagbayad ti butaw. Intakder ni Trump ti Board of Peace, a kano ket mangsukat iti awan kano serbi na a UN, tapno parwaren nga adda ti internasyunal a bendisyon ti panangipataw ti turay ti US ken Israel iti Gaza Strip.

Kinundenar ti nadumaduma a pagilyan ti US, bayat a dimmistansya uray dagiti nairut a kaalyado daytoy nga imperyalista. Nababalaw met dagitoy nga addang uray ti umili nga Amerikano, kagiddan dagiti nalawa a protesta laban iti pasista a rehimen Trump kanaig ti agsasaruno a kaso ti pammapatay dagiti ahente ti estado ken panangibalud iti mano pulo a ribo nga imigrante. Sumangsango met ni Trump iti nasaknap a gura kanaig iti naawagan nga “Epstein Files” a mangisangsangkot kenkwana kadagiti sekswal a krimen kadagiti babbai ken ubbing.

Iti Pilipinas, pilit a magabgabburan ti sangalubongan a panagbatikos iti US babaen ti maka-US a masmidya, kagiddan ti orkestrado nga atake laban iti China. Iladladawan da ti China a “pangta” iti soberanya ti Pilipinas, tapno patibkeren ti paulit-ulit nga inuulbod a kasapulan ti Pilipinas ti tulong ti US tapno salakniban ti pagilyan. Ti pudno a pangta iti Pilipinas ket ti dumakdakkel a posibilidad ti agresyon a militar ti US iti Asia, kasabwat ti Japan, Australia ken dadduma pay nga alyado na a turay. Iguyod da dagiti Pilipino iti maysa nga internasyunal a risiris a kaniwas iti interes ti umili.

Kasapulan la unay tatta nga ilaban ti umili ti pudno a nailyan a soberanya. Rumbeng a papigsaen ti patriyotiko a tignay masa tapno ilaban ti panangduprak kadagiti base militar ti US, ti panangpadisi iti amin a gangannaet nga imperyalista a tropa ken ti pananggibus iti militar a pannakibiang ti US iti pagilyan.