Sining nagligad nga pila ka adlaw, ginpulihan sang pila ka maka-US nga pulitiko kag opisyal sang rehimen US-Marcos ang mga opisyal sang embahada sang China sa Pilipinas, nga gina-akusaran nga “indi maayo nga bisita” kag sang “pagpasilabot.” Samtang ginakuha sini ang atensyon sang publiko, malinong nga nagapinagusto ang mga pwersang nabal kag militar sang US sa pungsod, sa tayuyon sini nga pagpabaskog sang pwersang militar sa duta kag kadagatan sa palibot sang Pilipinas.

Naglupok ang mainit nga habuyanay sang tinaga pagkatapos nga magpalapta si Cmdr. Jay Tarriela, tagpamaba sang Philippine Coast Guard-West Philippine Sea (PCG-WPS), sang mapang-insulto nga imahen nga nagatampalas sa lider sang China, taliw-as sa mga talaksan sang pag-respeto sang mga pungsod. Nahimo sini nga sulsolan ang mabaskog nga reaksyon sang mga opisyal sang China, nga naggamit man sang mabug-at nga tinaga para pangayuon nga papanaugan sang aksyon pangdisiplina ang opisyal sang PCG.

Ang mga aksyon ni Tarriela kalkulado agud garit-gariton ang China. Ginhimo ini isa ka adlaw antes hiwaton ang “bilateral consultation,” isa ka dayalogo nga gin-host sang China sa Xiamen City. Ang papel lang niya amo ang paypayan ang antagonismo batuk sa China, sugod sang gintalana siya nga tagpamaba sang PCG-WPS sadtong 2023, sunod sang paghanas niya sa Washington.

Ginsuportahan siya sang pila ka senador sa pagpanguna ni Sen. Risa Hontiveros. Napapirma niya ang 15 ka senador sa resolusyon agud batikuson ang China, kadungan sang huging-huging nga estorya sang pila ka senador nga ideklarar nga “persona non grata” ang opisyal sang embahada sini. Daw ginasunog na nila ang taytay sang diplomasiya.

Si Hontiveros kilala nga Amboy kag manugsolsol sang sentimyentong kontra-China. Ang lagas niya ang suporta sang US para sa ambisyon sa 2028. Pagpakuno-kuno lang ang “pagpangapin sa sobereniya” nga ginhimo niya kag Senado sa pagbatikos sa China. Wala nagreklamo ang Senado sa pagpirma sang Philippines-Japan Acquisition and Cross-Servicing Agreement sadtong Enero 15. Sadtong 2024, ginpalig-on sini ang Reciprocal Access Agreement (RAA). Ini lunsay lubos nga paglapak sa independensya sang pungsod nga nagahatag sa militar sang Japan sang kahilwayan nga magguwa-sulod sa pungsod, nga kabahin sang papel sini bilang kabulig sang US sa estratehiyang “first island chain” para palibutan ang China.

Ni isa indi kolektibo nga nagpanindugan ang Senado batuk sa nagadamo nga mga base militar sang US sa Pilipinas sa idalum sang EDCA ukon batuk sa mga sekreto nga pasilidad sang US sa Palawan, Ilocos, Aurora, Cagayan kag iban pa nga lugar, ukon batuk sa pagpakat sang US sang mga long-range missile kag iban pa nga armas pang-gyera sini sa mga likom nga lokasyon sa pungsod. Hipos ini sa pagsulod kag pagpalawod sang mga barkong pang-gyera sang US sa kadagatan pang-teritoryo kag pagsulod sini sa mga isla sang Pilipinas, kag sa pag-angkla sang mga higante nga barkong nabal sang US sa kadagatan nga eksklusibo sang pungsod.

Wala man sini ginkontra ang tayuyon nga paghanda sang US sang gyera kag pagpakat sang nagadamo nga mga kagamitan kag tropang militar sa Pilipinas. Wala ini nagtingog batuk sa plano sang US nga “ibaligya” sa Taiwan ang mga EDCA site sang US sa Pilipinas, ukon plano nga gamiton ang Davao Gulf bilang “refuelling hub” para magserbisyo sa mga pwersang nabal sang US. Mahipos ang Senado sa plano nga itukod ang pabrika sang bala sa Subic nga mangin kabahin sang plano sang US nga gamiton ang pungsod nga base sang operasyon pang-gyera sini sa Asia.

Samtang nagawakwak sa China ang pila ka pulitiko kag opisyal ni Marcos, malinong nga ginatukod sang US ang bag-o nga Army Rotational Force-Philippines, sa idalum sang iya Task Force Philippines. Kabulig ang AFP kag pwersang militar sang mga alyado sini nga pungsod, ginpatigayon liwat ang bag-o nga mga maniobra sa kadagatan nga sakop sang exclusive economic zone sang Pilipinas.

Samtang sa Pilipinas nagasingki ang mga tirada kontra-China pabor sa US, sa bug-os nga kalibutan nagabaskog ang mga pagbatikos sa imperyalismong US. Ini pagkatapos sini lusubon ang Venezuela kag gin-abdak ang presidente sini nga si Nicolas Maduro kag asawa niya nga si Cilia Flores. Ginsundan ini sang deklarasyon nga agawon ang pungsod Greenland, mga pagpahog sa Mexico, Colombia kag Panama, pagpanulsol sang kagamo angot sa peligro sang paglusob sa Iran, kag ginpasingki nga pagpang-ipit sa Cuba kag mga pungsod nga nagapakig-abyan ukon nagapakig-baligyaanay diri.

Ginbuyagyag sang mga ini ang pagkalabnaw sang ginasiling sang US nga “international rules-based order.” Gin-athag sang pasistang buang nga si Trump nga “America First” ukon interes sang US ang matuod nga yara sa likod sini, sa pagkarakasa nga agawon ang kontrol sa mga ginakuhaan sang lana kag hilaw nga materyales sa lain-lain nga bahin sang kalibutan. Agud indi mahigot sa internasyunal nga layi, ginkuhaan sini sang kusog ang United Nations paagi sa pagguwa sa mga komisyon sini, kag indi pagbayad sang butaw. Gintukod ni Trump ang Board of Peace, nga kuno magabulos sa wala sang serbe nga UN, agud ipaguwa nga may internasyunal nga basbas ang pagpatuman sang gahum sang US kag Israel sa Gaza Strip.

Ginkundenar ang US sang lain-lain nga pungsod, samtang nagdistansya bisan ang mga malapit nga kaalyado sini nga imperyalista. Ginbatikos man ang mga tikang nga ini bisan sang pumuluyong Amerikano, kadungan sang mga lapnagon nga protesta batuk sa pasistang rehimen Trump kaangot sang sunod-sunod nga kaso sang pagpamatay sang mga ahente sang estado kag pagbilanggo sang puluan ka libo nga imigrante. Nagaatubang man si Trump sang lapnagon nga pagkangil-ad tungod sa angot niya kay Jeffrey Epstein, ginpamatbatan nga kriminal sa mga kaso sang pagpang-abuso sa kababaehan kag mga bata.

Sa Pilipinas, pilit nga ginatabunan ang pangkalibutanon nga pagbatikos sang US paagi sa maka-US nga masmidya, kadungan sang orkestradong atake batuk sa China. Ginalaragway ang China nga “peligro” sa sobereniya sang Pilipinas, agud suportahan ang pasulit-sulit nga binutig nga kinahanglan sang Pilipinas sang bulig sang US agud depensahan ang pungsod. Ang matuod nga peligro sa Pilipinas amo ang nagadako nga posibilidad sang agresyon militar sang US sa Asia, kakunsabo ang Japan, Australia kag iban pa nga alyado sini nga gahum. Ginaganoy sini ang mga Pilipino sa isa ka internasyunal nga kagamo nga taliw-as sa interes sang pungsod.

Tuman ka kinahanglanon subong nga ipakigbato sang pumuluyo ang matuod nga pungsodnon nga sobereniya. Dapat pabaskugon ang makipungsodnon nga kahublagan masa para ipakigbato ang pagwasak sang mga base militar sang US, ang pagpalayas sa tanan nga dumuluong nga imperyalistang tropa, kag ang pagtapos sa pagpasilabot militar sang US sa pungsod.